Guddoonka baarlamaanka oo dalbaday in lagu dhaqsado magacaabista gollaha wasiirada
Axad, Maarso, 19, 2017 (HOL) – Guddoomiye ku-xigeenka
labaad ee baarlamaanka Soomaaliya Mahad Cabdalla Cawad oo maalintii shalay shir
guddoominayay kulan magaalada Muqdisho
ay ku yeesheen mudanayaasha baarlamaanka Soomaaliya ayaa ka dalbaday
madaxweynaha iyo ra’iisal wasaaraha in ay deg deg u soo dhisaan xubnaha gollaha
wasiirada.
Guddoonka baarlamaanka ayaa arintan ku micneeyay in ay
fududeyneyso ka qeybqaadashada gurmadka abaaraha madaama xildhibaannada u
xayiran yihiin ansixinta xukuumada cusub ee la soo dhisayo.
‘’Xildhibaan walba waxaa uu diyaar u yahay in uu dib ugu
laabto deegaankii laga soo doortay si dhibta jirya uu ula qeybsado bulshada uu
baarlamaanka ku matalayo, islamarkaana uu gacan uga geysto sidii dadkaa loo
gargaari lahaa, sidaa daraadeed baarlamaanku waxaa uu u xayiran yahay dhismaha
xukuumada si loo korkeeno ayuu yiri’’ guddoomiye ku-xigeenka labaad ee
baarlamaanka Soomaaliya,
Xildhibaannada baarlamaanka ayaa maalintii shalay meel
mariyay qarraarka gurmadka abaaraha oo maalmihii ugu danbeeyayba ay dood ka
lahaayeen.
Baaqa guddoonka baarlamaanka Soomaaliya ee ah in lagu
dhaqasado dhismaha gollaha wassiirada ayaa imanaya xili uu dib u dhac weyn
ka jiro magacaabista xubnaha gollaha wasiirada marka laga eego waqtigii koobnaa
ee madaxweynaha uu ku soo magacaabay ra'iisal wasaaraha, inkastoo ra’iisal
wasaaraha uu sharciga u ogolaanayo in mudo 30 cisho ah uu ku soo dhiso
gollihiisa wasiirada.
C/raxmaan Diini, Hiiraan Online
[email protected]
