Qof lagu dhax toogtay garoonka diyaaradaha magaalada Paris
Sabti, Maarso, 18, 2017 (HOL) -Saraakiil Faransiis ah ayaa
sheegay in nin askari ka dafay qori lagu toogtay garoonka Orly ee magaalada
Paris.
Ciidanka nabadgelyadu waxay ninkaa dileen kaddib markii uu qoriga ka qaatay
askarigaas oo joogay qaybta koonfureed ee garoonka.
Garoonka diyaaradaha ayaa la xidhay dhacdadaa kaddib, oo maamulka garoonka
waxa uu sheegayaa in ay ahayd mid aad u khatar ah, rakaabkii la socday
diyaaradihii markaa uun soo cago dhigtayna waxa lagu wargeliyey in aanay soo
dhaadhicin.
Waxaa haatan garoonka ka socda hawl gal nabad gelyo oo ay wadaan khubarada
baadha bambooyinka iyo booliska oo iyaguna goobaya hadii ay jiraan cid ninkaa
la socotay oo garoonka ku jirta.
Boolisku waxaa kale oo ay doonayaan in ay hubsadaan in ninkaa la toogtay
walxaha qarxa uu isku soo xidhay iyo in kale.
Ugu danbeyntii, madaarka Orly, oo ku yaal dhinaca koonfureed ee garoonka Paris, ayaa ah madaarka labaad ee ugu mashquulka badan garoomada ku yaal
caasimadda Faransiis.
C/raxmaan Diini, Hiiraan Online
[email protected]
