Wararkii ugu danbeeyay khasaaraha dhimashada duqeynta doontii ay la socdeen qaxootiga Soomaliyeed
Jicmo, Maarso, 17, 2017 (HOL) – Tirada dhimashada ayaa kor u sii dhaafeysa
40 ruux kadib markii diyaarad nooca qumaatiga u kaca ay gantaal ku dhufatay doon
ay la socdeen qaxooti Soomaaliyeed oo ku sii jeeday dalka Suudaan, kana
ababaxday xeebaha Yemen.
Qaar ka mid ah dadkii laga soo badbaashay doonta ayaa sheegay in ay u socdeen dalka Sudan,
ayaga oo ka baxsanyey dagaallada ka socda dalka Yemen.
Saraakiil ka tirsan ururka socdaalka
adduunka ee IOM ayaa sheegay in qiyaastii 80 qaxooti ah la soo badbaadiyey,
islamarkaana loo qaaday magaalada Xudeyda.
Mucaaradka Xuutiyiinta Yemen ayaa ku eedeeyey isbaheysiga Sacuudiga uu
hoggaamiyo inay fuliyeen weerarka. Isbaheysiga ayaa dhowaanahan duqeymo culus
ku waday magaalada Xudeyda, ayaga oo ku eedeeyey mucaaradka shiicada inay hub
kasoo geliyaan.
Isbaheysiga Sacuudiga uu hoggaamiyo, islamarkaana Mareykanka uu taageero
ayaa duqeymo ka fulinayey dalka Yemen tan iyo sanadii 2015, ayaga oo isku
dayaya inay magaalada Sanca ka bixiyaan gacan ku haynta Xuutiyiinta.
Ugu danbeyntii, mucaaradka Shiicada
ayaa weli gacanta ku haya Sanca iyo inta badan waqooyiga Yemen. Illaa iyo
iminka dagaalka Yemen ayaa waxaa ku dhintay qiyaastii toban kun oo shacab ah.
Arintan ayaa noqoneysa dhimashadii ugu badneyd ee soo wajahday qaxooti
Soomaaliyeed oo markii hore ka barakacay dalkooodii hooyo, balse mar kale ka sii barakacay dagaallada dalkii ay maciin bideen ee
Yemen, hasse ahaatee ugu danbeyntii geeriyooday iyaga oo safar u sii ah dal
saddexaad.
C/raxmaan Diini, Hiiraan Online
[email protected]
