Sanad Guurada 57-aad ee xiriirka Somaliya iyo Pakistan
Jimco, Maarso, 17,
2017 (HOL) - Sanad guuradda 57 aad xiriirka
Somaliya iyo Pakistan ayaa lagu qabtay magaalada Karachi ee koofurta dalka
Pakistan. Ciyaartooy ka kala socday labada dal ayaa ciyaarta kubadda cagta
kusoo bandhigay garoonka kubadda cagta ee magaalada Karachi.
Ciyaartaan oo ahayd mid lagu
maamuusayay xiriirka 57 sano jirsaday ee Somaliya iyo Pakistan ayaa waxaa kasoo
qayb galay marti sharaf ay ka mid ahaayeen wasiirka Sports ka dowladda Pakistan
ee gobalka Sindh mudane Sardar Ahmed, Safiiradda Somaliya u fadhida Pakistan
marwo Khadija Mohamoud AlMakhzuumi, wasiirkii hore ee arrimaha gudaha Somaliya
ahaana sidoo kale madaxwaynihii Galmudug mudane Abdikarin Hussain Guuleed,
Qunsulka Somaliya ee Pakistan Mudane Abdullahi Haaji Daud Warsame, iyo
masuuliyiin sare sare oo ka kala socday labada dal.
Ciyaartan oo ahayd mid kulul ayaa
labada kooxood is mari waayeen, waxayna ugu danbayn noqotay in lagu kala baxo
rigoore ama gool ku laad iyadoo kooxdii Somaliya ay dhalisay afar gool halka
kooxdii Pakistan dhalisay saddex gool sidaas ayaana guushu ku raacday Somaliya.
Taageerayaal badan oo ka kala socday labada dal ayaa usoo daawasho tagay
ciyaarta oo ahayd mid taariikhi ah oo aan waligeed horay uga dhicin
Pakistan.
Wasiirka sports Pakistan ayaa
sheegay in uu ku faraxsanyahay hormarka xiriirka Somaliya iyo Pakistan isagoo
sidoo kale sheegay inuu rajaynayo in labada dal ay sii hormarin doonaan
xiriirkooda saaxiibtinimo.
Safiiradda Somaliya ee Pakistan ayaa dhankeeda
sheegtay in ciyaarta noocaan oo kale ah ka turjumayso xoojinta xiriirka labada
dal, waxayna u rajaysay guud ahaan labada dal guul iyo baraare iyadoo sidoo
kale sheegtay inay gacan ka gaysan doonto sidii loo hormarin lahaa xiriirka
Somaliya iyo Pakistan.
Ugu danbayntii ciyaartaan oo ahayd
mid xiiso leh ayaa kasoo qayb galayaashu sheegeen inay ku faraxsanyihiin inay
kasoo qayb galaan, waxayna sheegeen in ay tahay markii ugu horraysay oo ay
daawadaan ciyaar noocaan oo kale ah oo dhex maraysa Pakistan iyo Somaliya.
Karachi waxay hooy u tahay dad badan oo Soomaaliyeed kuwaas oo isugu jira
arday, ganacsato iyo famillo.
Duran Hassan
Karachi, Pakistan