Ra’iisal Kheyre : Waxaa bilaabanaya isla xisaabtan hay’addaha dowladda ah
Jimco, Maarso, 17, 2017 (HOL) - Ra’iisul Wasaaraha
Soomaaliya Xassan Cali Kheyre ayaa sheegay inay bilaabaneyso waqtigii isla
xisaabtanka hey’adaha dowladda, isagoo cadeeyay inuu ku dadaali doono nidaam
kala dambeyn ah oo xukuumaddiisa la timaado.
Ra’iisul wasaare Kheyre ayaa sheegay in la ilaalin doono xuquuqda shaqaalaha
dowladda, isla markaana shaqaalaha qudhooda lagila xisaabtami doono shaqooyinka
ay hayaan.
Mr Kheyre ayaa xusay inay muhiim tahay in hay’ad walba ay ka soo baxdo
howsha loo igmaday, isagana uu ku dadaali doono kormeerka iyo la xisaabtanka
hay’adaha dowladda
“Waxaa ku dadaali doonaan nidaam kala dmabeyn inuu yimaado, idinkana
xuquuqdiina la ilaaliyo, wax ka dhaxeyn doonaan ma jiri doonaan dadka inay
halkan ka shaqeeyaan ama aanay ka shaqeyn, ma jiri doonto in xafiisyada
dowladda oo dhan inay dad ku qoran yihiin ayagoo shaqeyneyn”ayuu yiri ra’iisul wasaare
Kheyre.
Hadalkan ayuu shalay u jeediyay ra’iisul wasaaraha, kulan uu la qaatay
shaqaalaha xafiiskiisa, waxaana uu balan qaaday in cid walba lagula xisaabtami
doono howsha ay heyso.
Ugu danbeyntii, shaqaalaha dowladda ayaa lagu dhaliilaa in iyagoo aysan
shaqeyn inay mushaar iska qaataan, qaarkood waxaa la sheegaa inay min labo
wasaaradood ka shaqeeyaan, iyagoo adeegsanaya labo magac oo ay mushaarka ku
qaataan.
C/raxmaan Diini, Hiiraan Online
[email protected]
