Wasiirka amniga oo Afur u sameeyay xildhibaanno ka tirsan labada Aqal ee dalka
Isniin, June, 19, 2017 (HOL) - Wasiirka wasaaradda amniga gudaha dowladda
federaalka Soomaaliya Maxamed Abuukar Isloow (Ducaale) ayaa afur u sameeyay
Xildhibaano ka tirsan Labada Aqal ee dalka.
Kulanka Afurka ayaa la isku weydaarsaday talooyin iyo fikrado la xiriiray
howlaha amniga dalka iyo arrimo kala duwan oo dalka ah, iyadoo wasiirka uga
warbixiyay qorshayaasha Xukuumadda uga degsan arrimaha amniga.
Wasiirka Amniga Gudaha ayaa sheegay in xukuumadda ay wado dadaalo ay ku
sugeyso amniga dalka, gaar ahaan Caasimadda Muqdisho, waxaana uu u sharaxay xildhibaanada
qaabka uu u socdo howl-galada xasilinta Caasimada.
Qaar ka mid ah xildhibaanada iyo Senatarada ayaa ka mahad celiyay Afurka uu
u sameeyay wasiirka Amniga Gudaha, waxaana ay sheegeen in loo baahan yahay
kulamada oo kale in la isku weydaarsado wixii talo iyo tusaale ah.
Kulankan uu la qaatay Wasiirka Xildhibaano ayaa ku soo beegmaya, iyadoo
dhowaan uu Wasiirku soo saaray amar lagu farayo Xildhibaanada iyo Wasiirada
Xukuumadda inay muddo 14 cisho gudahood ku soo diiwaan geliyaan ilaaladooda iyo
hubka ay wataan.
C/raxmaan Diini, Hiiraan Online
[email protected]