Cabdiwali Gaas : Waxaa jira ganacsato Al-shabaab lacago u dira
Jimco, July, 14, 2017 (HOL) - Madaxweynaha
dowlad gobolleedka Puntland Cabdiwali Maxamed Cali Gaas ayaa sheegay in ay ka war hayaan qaar ka mid ah
ganacsatada Puntland oo lacago u dira sida uu hadalka u dhigay Al-shabaab.
Isaga oo ka hadlayay khilaafka dhinaca canshuurta
ah ee ka taagan magaalada Boosaas ayuu sheegay in wax lala yaabo tahay in ganacsatada Puntland diidaan bixinta
canshuurta oo ah mid sharci ah oo ay ansixiyeen golayaasha dowladda.
‘’Waxaan ognahay ganacsato reer Puntland oo
dhaqaale u dira Al-shabaab iyaga oo waliba adeegsanaya Telleefoonnada gacanta,
sababta ay sidaa u sameynayaanna waa baqdin ay ka qabaan Al-shabaab’’ ayuu yiri
Cabdwali Gaas.
Shacabka ayuu ku booriyay in ay bixiyaan
canshuurta oo ah ayuu yiri mid laga qaado xitaa ciidamada difaaca ku jira ee la
dagaalamaya wax uu ugu yeeray kooxaha cadawgga.
‘’ Askariga bishii qaadanaya $ 70 dollar ayaa
canshuurta laga jaraa, marka qof ganacsade ah ayaa diidaya in uu bixiyo,
arintaa ma’aha wax dhici kara, amniga in la suggo waxaa ka horeeya in dadku ay
bixiyaan canshuurta ayuu hadalkiisa sii raaciyay.
Magaalada Boosaaso ayuu sheegay in ay ka
socdaan mashaariic kala duwan oo ay ka mid yihiin dhismaha Jidad muhiim u ah
isku socodka dadka iyo gadiidka, isaga oo sheegay in mashaarciidaa sii socon
karin haddii aan maamulka leys bar bartaagin.
Waayadii ugu danbeeyayba magaalada Boosaaso
waxaa ka jiray khilaaf ka dhashay canshuur lagu soo rogay ganacsatada taasoo sababtay in uu istaago
ganacsigii magaalada.
C/raxmaan
Diini, Hiiraan Online
[email protected]