Gollaha wasiirrada oo meel mariyay wax ka badalka xeerka saxaafadda
Khamiis, July, 13, 2017 (HOL) – Gollaha wasiirrada xukuumadda Soomaaliya
ayaa fadhigoodii maanta ee magaalada Kismaayo ku meelmariyay wax ka badal lagu
sameeyo xeerka saxaafadda oo horay xildhibaannadu u ansixiyeen.
Wasiirka wasaarrada warfaafinta Soomaaliya C/raxmaan Maxamed Cismaan
Yariisoow ayaa gollaha wasiirrada warbixin ka siiyay marxaladaha uu soo maray xeerka
oo baarlamaankii hore uu horey u ansixiyey bishii December 2015.
Wasiirka ayaa Yiri “Sababaha keenay in wax-ka bedel loogu sameeyo xeerkan saxaafada
ayaa aheyd cabashooyin ka yimid suxufiyiinta Soomaaliyeed oo qodobo ka mid ah u
baahdeen in wax laga bedello sida qodobka 35aad oo sheegayey in suxufiga uu
heysto Shahaado jaamicadeed ee suxufinimo. Sidaad daraadeed ayaan qodobkan wax
uga bedelnay iyo sidoo kale qodobo kale oo ka mid ahaa Xeerkan.”
Wasaarradda ayaa wadatashiyo ballaaran la yeelatay wasaarradaha warfaafinta dowlad-goboleedyada,
bahda warbaahinta Soomaaliyeed, Somali Media Support Group iyo dhammaan dadka
ay khuseyso, taasoo keentay in qodobo la isku raacay lagu bedellay kuwii cabashooyinka
ka yimid.
Xeerkan Saxaafada oo ay gollaha wasiirradu ansixiyeen maanta ayaa loo gudbin
doonaa golaha Shacabka si ay waajibaadkooda dastuuriga ah uga gutaan.
C/raxmaan Diini,
Hiiraan Online
[email protected]
