Jen Subagle : Waxa aan la dagaalameynaa waa dad Soomaali u eg oo Af Soomaali ku hadlaya
Khamiis, July, 13, 2017 (HOL) –Taliyaha guud ee ciidamada
howlgalka midowga Africa AMISOM Jen Cismaan Subagle ayaa sheegay in dagaalka
lagula jiro Al-shabaab yahay mid dhibaatadiisa xambaarsan.
Dadka ay la dagaalamayaan ayuu sheegay in ay yihiin dad Soomaali ah oo ku hadlaya Af Soomaali, sidaa daraadeed ay
adag tahay in la kala garto iyaga iyo dadka shacabka ah.
‘’Dadka aan la dagaalameyno waa dad cadaw ah oo Soomaali eg, Af Soomaali ku
hadlaya intooda badan u dhashay dhulka ay ka dagaalamayaan, waad garan gartaan
marka dagaalka noocaa ah waqtiga uu qaadanayo, waana tan keentay in AMISOM mudo
10 sano ah joogaan dalka’’ ayuu yiri taliyaha ciidamada AMISOM.
Mar uu ka hadlayay dhibaatada ka taagan in leysku furo jidadka magaalooyinka
ay dowladda maamusho ayuu yiri’’ In
jidadka la furo qiimo badan ayeey noogu joogaan, waayo marka aan 20 Askari
dirro, waxaa dirqi halkii ay ku socdeen ku taga 19 askari oo mid ka mid ah ayaa
la dilayaa, marka howlgalka noocaas ah oo qof ajnabi ah uu fulinayo oo dalkiisii
ka yimid isaga oo nool isaga oo meyd ahna la celinayo dhibaato ayeey nagu tahay’’
ayuu yiri Jen Subagle.
Shacabka ee Soomaaliyeed ayuu ugu baaqay in ay gacan siiyaan howlgalka
AMISOM, madaama ayuu yiri ay adag tahay in lagu guuleysto dagaalka haddii aan
la helin taageerada shacabka.
Hadalka ayuu ka sheegay Jen Subagle munaasabad tababar loogu soo xirayay
xildhibaanno ka tirsan baarlamaanka Hirshabeelle.
C/raxmaan Diini, Hiiraan Online
[email protected]