Wararka Maanta: Khamiis, July 13, 2017-DAAWO: Shirka golaha xukuumadda Soomaaliya oo si rasmi ah uga furmay Kismaayo

DAAWO: Shirka golaha xukuumadda Soomaaliya oo si rasmi ah uga furmay Kismaayo

Khamiis, July, 13, 2017 (HOL) – Kulanka todobaadlaha ee golaha xukuumadda Soomaaliya oo todobaad walba maalinta khamiista ah lagu qaban jiray magaalada Muqdisho ee caasimadda dalka ayaa maanta ka furmay magaalada Kismaayo ee xarunta gobolka J/hoose.

Shirka todobaadlaha ee golaha xukuumadda waxaa shir gudoominayay raysul wasaaraha xukuumadda federaalka Soomaaliya, waxaana sidoo kale munaasibadda furitaanka fadhiga xukuumadda ka qeybgalay madaxweynaha dowlad goboleedka Jubaland Mudane Axmed Max’ed Islaam.

Ugu horeyn waxaa madasha ka hadlay madaxweynaha dowlad goboleedka Jubaland oo sheegay in uu aad ugu faraxsanyahay in magaalada Kismaay ay marti geliso shirka golaha xukuumadda Soomaaliya, arintan oo uu sheegay in ay kaalin ka qaadaneeyso dowlad wanaagga iyo weliba ku baahinta nidaamka dowliga ah ee dalka.

Raysul wasaaraha oo dhankiisa furitaanka ka hadlay ayaa kula dardaarmay golaha xukuumadda dowladda Soomaaliya in wasaarad walba ay kulan is xogwareeysi ah la qaadato wasiirka ay isku shaqada yihiin ee dowlad goboleedka Jubaland.

Shirka golaha wasiirada ayaa haatan ka socda hoolka shirarka aqalka martida Jubaland ee magaalada Kismaayo oo ku yaal afaafka hore ee laga galo dekedda Kismaayo, islamarkaana dul saaran jaziirad badda kulaasha.

Waa markii ugu horeeysay oo shirka golaha wasiirada lagu qabtyo meel ka baxsan caasimadda tan iyo wixii ka danbeeyay dowladdii uu madaxweynaha ka ahaa AUN Madaxweeyne C/laahi Yuusuf Axmed.

Xasan Nuur, Hiiraan Online
[email protected]
Kismaayo-Soomaaliya.