Digniin loo jeediyay dadka garsoorka u doonta deegaannada ay ka arimiyaan Al-shabaab
Khamiis, July, 13, 2017 (HOL) – Taliyaha nabad-sugida
gobolka Shabeellaha Dhexe Cabdulqaadir Cabdulaahi Xaayow ayaa markii ugu
horeysay digniin culus u diray dadka garsoorka u doonta maxkamadaha Al-shabaab,
isaga oo sheegay in tallaabo cad laga qaadi doono cid kasta oo dacwad u gudbisa
meel aan aheyn maxkamadaha dowladda federaalka.
‘’ Go’aan cad ayaa laga gaaray oo dhinaca sharciga waafaqsan cid kasta oo
lagu helo in ay garsoor u raadisay meel aan aheyn maxkamadaha dastuuriga ah ee
dowladda federaalka’’ ayuu yiri taliyaha ciidamada nabad-sugida gobolka
Shabeellaha dhexe
Inta badan bulshada ku dhaqan magaalooyinka ay maamusho dowladda federaalka
ayaa marka ay is qabtaan dacwadahooda u gudbiya maxkamadaha Al-shabaab ee ka
furan deegaannada ka baxsan dhulka ay
maamusho dowladda halkaasoo ay ku xukuntamaan.
Gaar ahaan arimahan ayaa dhaca marka ay dadku ku kalsoonaan waayaan maxkamadaha
dowladda federaalka ee ka furan gobollada dalka, kuwaasoo dacwadahooda geystay
deegaannada ay ka arimiyaan Al-shabaab.
“Qofkii tirsanaya in looga xukmiyay dacwad si qalad ah waxaa u banaan in uu
racfaan u qaato maxkamada gobolka iyo weliba in uu racfaan u sii qaato Maxkamada
sare ee dalka intaasna cadaalad darro iskuma raacayaan.”ayuu yiri taliye
Xaayow.
Waa markii ugu horeysay oo ay soo baxdo digniin la xiriirta in ay bulshadu
garsoor ka raadiyaan meel aan aheyn maxkamada dowladda federaalka.
C/raxmaan Diini, Hiiraan Online
[email protected]
