Mahad Cawad : Sharciga ayaa lala tiigsanayaa cid kasta oo warar dacaayad ah ka faafisa xildhibaannada
Khamiis, July, 13, 2017 (HOL) – Guddoomiye ku xigeenka
Labaad ee baarlamaanka Soomaaliya Mahad Cabdalla Cawad ayaa sheegay in la sharciga
lala tiigsan doono cid kasta oo warar
been abuur ah iyo dacaayad ka faafisa sida uu hadalka u dhigay xildhibaannada baarlamaanka Soomaaliya.
Waxa uu sheegay in hadda kaddib aysan
aqbali doonin in la iska dacaayadeeyo xildhibaanada Qaranka ama laga sheego
warar aan munaasabad ku aheyn.
Waxaa uu sheegay in ay muhiim tahay in cadaalada laga wada shaqeeyo oo si
isku mid ah ah loo dacweeyo loona ganaaxo mas’uuliyiinta dowladda iyo muwaadiniinta Soomaaliyeed hadii ay dambi
ka galaan xildhibaanada Qaranka.
Guddoomiye ku-xigeenka ayaa intaa ku darray in ay jiraan qaladaad waaweyn maalin kasta ay galaan dadka
balse aan lagu ciqaabin, waxaa uu xusay in ay ku dadaalayaan sidii loo ciqaabi
lahaa dadka mar walbo dacaayadaha ka faafiya xildhibaanada baarlamaanka.
Sidoo kale guddoonka baarlamaanka Soomaaliya ayaa shacabka Soomaaliyeed ugu
baaqay in ay ka fogaadaan in ay qalad toos ah ka galaan xildhibaanada Qaranka
oo ay warar been abuur ah ka sheegaan.
Hadalka ayaa imanaya xili dhawaan xildhibaanno ka tirsan baarlamaanka
Soomaaliya ka carroodeen hadal uu jeediyay Sheekh Nuur Baaruud Gurxan oo
munaasabad ka sheegay in ay guryahooda ku weerari doonaan xildhibaannada la
sheegay in ay wadaan mooshinka ka dhanka ah xukuumada federaalka.
C/raxmaan Diini, Hiiraan Online
[email protected]