Wasiirka Isgaarsiinta oo sheegay waqtiga rasmiga ah dib loo helayo adeeggii Internet-ka Fiber Optic
Arbaco, July, 12,
2017 (HOL) – Wasiirka wasaaradda Boostada iyo Isgaarsiinta xukuumada Soomaaliya
Cabdi Canshuur ayaa sheegay in Markabkii cilidbixinta uu yimid maalintii
shalay, lana filayo in sida ugu dhaqsiyaha badan dib loogu soo celiyo adeeggii
Internet-ka.
‘’ Markabkii cilidbixinta waa uu yimid waxaa uu hadda howsha
ka bilaabay halka ay ka soo leexato Fiilada Internet-ka ee Fiber Optic, Jimcaha
ayaa la filayaa in uu soo gaaro dekedda weyn ee Muqdisho’’ ayuu yiri wasiirka.
Wasiirka ayaa intaa ku darray maalinta Jimcaha uu si rasmi
ah uga howlgali doono halka ay cilada ka jirto oo ah meel aan ka fogeyn xarunta
Xalane, islamarkaana Internet-ka
maalinta Axada la heli doono.
Wasiir Canshuur waxaa uu beeniyay sababta uu Internet-ka u
maqan yahay tahay lacago deyn ah oo lagu leeyahay shirkaddaha Isgaarsiinta,
isaga oo ku qanciyay bulshada Soomaaliyeed in dekeda Muqdisho wali ku sugan yahay Markabkii gooyay Fiilada Internet-ka
Fiber Optic.
Saameyn weyn ayeey arintan ku yeelatay adeegii guud ahaanba hay’addaha
dowladda iyo xiriirkii bulshda intaba, waxaana ay dowladdu sheegtay in
maqnaasha Internetka laga dhaxlay maalintii khasaare dhan $ 10 million oo doolar
C/raxmaan Diini, Hiiraan
Online
[email protected]
