Weerar Labo ruux ay ku dhinteen oo ka dhacay magaalada Muqdisho
Arbaco, July, 12, 2017 (HOL) - Rag hubeysan oo watay gaari ayaa maanta
degmada Yaaqshiid ee gobolka Banaadir weerar ku qaaday ciidamo ka tirsan
dowladda Soomaaliya oo ku guda jiray howlgalo nabad sugid ah.
Afhayeenka maamulka gobolka Banaadir Cabdifitaax Cumar
Xalane ayaa sheegay in weerarka uu ku dhintay Askari ka tirsan ciidamada
dowladda iyo gabar Ardey aheyd oo da’deeda lagu sheegay 14 sano jir waqtiga
uu weerarku dhacayay goobta mareysay.
‘’ Afar ruux ayeey ahaayeen kooxda weerarka geystay, gaari
yar ayeey wateen, walina baaritaanku waa uu socdaa, xogta oo dhameystiranna waa
sugeynaa’’ ayuu yiri afhayeenka maamulka gobolka Banaadir.
Weerarka ayaa sidoo kale waxaa ku dhaawacmay labo askari oo ka mid ahaa ciidamada la weeraray.
Inkastoo magaalada Muqdisho ay ka socdaan dadaallo la
doonayo in lagu sugo amniga haddana
dhinaca kale waxaa mar marka qaar dhaca weerarro iyo qaraxyo sababa khasaare
dhimasho iyo dhaawacba leh.
C/raxmaan Diini, Hiiraan Online
[email protected]