Madaxweyne Farmaajo oo daah furay Kalfadhigii labaad Golaha Aqalka sare ee Soomaaliya
Arbaco, July, 12, 2017 (HOL) -
Madaxweynaha Soomaaliya Maxamed C/llaahi Farmaajo ayaa maanta si rasmi ah u
furay kalfadhiga labaad Golaha Aqalka Sare ee Baarlamaanka Federaalka ah ee
Soomaaliya.
Xaflad furitaanka oo ka dhacday xarunta Aqalka sare ayaa waxaa ka qeyb galay
Madaxweynaha, Guddoomiyaha Aqalka sare, Guddoomiyaha Golaha shacabka, Ra’iisul
Wasaaraha, Xildhibaano, Madaxweynaha Galmudug iyo wakiilo ka socday Beesha
Caalamka.
Madaxwaynaha oo khudbad u jeediyey Golaha ayaa ugu baaqay mudanayaasha in ay
ka miri dhaliyaan himilooyinka shacabka ay wakiilka ka yihiin, ayna kaalin mug
leh ka qaataan dib-u-hanashada sharafta iyo qarannimada Soomaaliya.
Madaxwaynu waxa uu tilmaamay howlaha adag ee horyaala Golaha Aqalka Sare
sida Dib-u-eegista Dastuurka, Wadatashiga iyo u kuur gelidda xaaladaha
siyaasadeed iyo dhaqan-dhaqaale ee Dowlad Goboleedyada, Dejinta Hannaan
Awood-qaybsi oo ka dhexeeya Dowlad Goboleedyada iyo Dowladda Federaalka;
hannaankaas oo ku salaysan is aaminaad iyo danta guud.
“Waxaa tihiin rajadii Soomaaliya ka saari lahayd jahwareerka siyaasadeed,
waxaana la idinka fadhiyaa inaad dhidibada u aastaan dowladnimada, dalkana ka
hirgelisaan dheeli-tir iyo xasillooni siyaasadeed.”
“Waa in Labada Aqal ay ka wada shaqeeyaan sida danta qaranku ku jirto oo meel
iska dhignaa danaha qofeed, kooxeed ama beeleed, waana inay ka odayeeyaan
hannaanka Dib-u-eegista Dastuurka.”
Madaxaweynaha ayaa kula dardaarmay labada Gole ee Baarlamaaka Jamhuuriyadda
in ay xoojiyaan xiriirkooda, ayna adkeeyaan wada shaqaynta ka dhexeeysa labada
gole sida ku cad Qodobka 56aad ee Dastuurka Kumeel Gaarka ah Jamhuuriyadda
Federaalka Soomaaliya.
C/raxmaan Diini, Hiiraan
Online
[email protected]
