Amarkii maamulka gobolka Banaadir ee Beerta Nabada oo shaqeyn waayay
Arbaco, July, 12, 2017 (HOL) - Maamulka gobolka Banaadir ayaa ka laabtay amar uu
horay u soo saaray oo ahaa in shacabka
ku dhaqan magaalada Muqdisho lacag la’aan ku gali karaan Beerta Nabada oo ah
dhul ay dowladdu leedahay laakiin ay hagaajiyeen ganacsato Soomaaliyeed.
Arintan ayaa khilaaf weyn ka dhax abuurtay maamulka
gobolka iyo ganacsatada Beerta Nabada oo markiiba ku gacan-seyray amarka ka soo
baxay maamulka gobolka Banaadir ee ah in aan wax laga ah laga qaadi karin dadka
halkaa u dalxiis taga.
Kulan dhaxmaray ganacsatada iyo maamulka gobolka Banaadir
ayaa leysku afgartay in sidii hore loo daayo soo galitaanka Beerta ee aheyd in qofka u soo dalxiis tagaya laga
qaado lacag dhan $ 1 dollar.
Beerta Nabada oo ku taala dhabarka danbe ee taallada SYL
ayaa ka mid ah goobaha ugu qurxoon magaalada caasimada oo ay dadku u nasasho
tagaan, waxaana ku yaala gudaheeda maqaaxiyo laga cunteeyo, xarumo jimicsi iyo waliba agabyo kale oo ay
dadku ku madadaashaan.
Guddoomiyaha gobolka Banaadir Taabit Cabdi Maxamed iyo
tan iyo markii xilkan loo magacaabay soo saaray amaro is xig xigay oo
dhamaantood shaqeyn waayay, tasaale ahaan guddoomiyaha ayaa 26 bishii April ee sanadkan faray
waaxyaha kala duwan ee dowladda in is badal lagu sameeyay magaca gobolka Banaadir oo loo badalay ‘’
Benaadir’’ wixii hadda ka danbeeyana aan la isticmaalin karin magaca ''Banaadir'' laakiin ma noqon wareegtaasi mid shaqeysa oo wali waxaa muuqata in la
isticmaalayo magaca Banaadir.
Sidoo kale Bishii May ee sanadkan ayuu guddoomiyuhu soo
saaray wareegto kale oo gadiidka AMISOM looga mamnuucayo isticmaalka wadadda
Maka Al-Mukarama, hasse ahaatee isla maalintaa ay soo baxday wareegtada ayaa la
arkayay gadiidka AMISOM oo si caadi ah u isticmaalaya Jidka Maka Al-Mukarama waxaana amarka guddoomiyaha ku gacan-seyray afhayeenka ciidamada AMISOM.
C/raxmaan Diini, Hiiraan
Online
[email protected]