Kalfadhiga labaad golaha Aqalka sare ee baarlamaanka oo maanta furmaya
Arbaco, July, 12, 2017 (HOL) - Kalfadhiga labaad ee Golaha Aqalka sare ee
Baarlamaanka Federaalka ah ee Soomaaliya ayaa maanta furmaya, iyadoo lagu wado
in Madaxweynaha Soomaaliya Maxamed C/llaahi Farmaajo uu si rasmi u furo.
Xildhibaanada Aqalka Sare ayaa muddooyinkii u dambeeyay fasax ku maqnaa,
waxaana furitaanka kalfadhigooda uu ku soo aadayaa, iyadoo maalmo ka hor uu
furmay kalfadhigii labaad ee Golaha shacabka.
Madaxweynaha Soomaaliya Maxamed C/llaahi Farmaajo ayaa lagu wadaa inuu
maanta si rasmi ah u furo kalfadhiga labaad ee Aqalka sare, iyadoo ammaanka si
aad ah loo adkeeyay.
Xildhibaanada Aqalka sare oo ka kooban 54 Senator ayaa kalfadhigoodii
koowaad ku soo doortay guddiyo kala duwan, iyo hindise sharciyeedyo ay ku howl
galayaan.
Amniga ayaa siweyn loo adkeeyay inta u dhaxeysa Madaxtooyada illaa Baar Fiat
oo ku dhow xarunta Aqalka sare ee Kuleejadii Nova Somane.
C/raxmaan Diini, Hiiraan
Online
[email protected]