Dowladda oo magdhaw ka dalbatay Markabkii gooyay Fiilada Internet-ka Fibre Optic
Arbaco, July, 12 , 2017 (HOL) - Dowladda Soomaaliya ayaa magdhaw ka dalbatay
shirkadda markabkii gooyay Fiilada Fibre Optic ee soo marayay gunta hoose ee
badda, iyadoo markab la sheegay inuu arrintan ka dambeeyay lagu amray in aanu
ka bixi karin xeebaha Muqdisho.
Xeer Ilaaliyaha Guud ee Qaranka Axmed Cali Daahir ayaa sheegay in muddo 15
maalmood ka badan ay Internet-ka Fibre Optic uu ka go’an yahay Koofurta
Soomaaliya, ayna sababtay khasaare baaxad leh.
Dr. Axmed Cali Dahir ayaa sheegay in maalin walba la khasaaro lacag dhan
10-milyan oo dollar, kaas oo sababay Internet la’aanta ka jirta Koofurta
Soomaaliya, isla markaana uu saameyn ku yeeshay adeegyadii bulshada.
Waxaa uu sheegay in magdhaw laga doonayo shirkadii ku lug laheyd dhibaatada
ka dhalatay Internet la’aanta, waxaana uu ka dalbaday inay jawaab ka bixiyaan.
“Cidii ku lug leh arrintan sharciga ayaa lala tiigsanaa, shirkadda
markabkaas is ka leh waxaa laga rabaa magdhow inay bixiyaan oo ah dhibaatada ay
geystaan, jawaab ayaana laga sugayaa”ayuu yiri Dr. Axmed Cali Dahir.
Xeer Ilaaliyaha Qaranka ayaa sheegay in xilliga aanay Soomaaliya aheyd dal
wixii la doono laga sameeyo oo laga dhaqaaqo.
Markab taagan agagaarka Dekeda Muqdisho ayaa loo heystaa inuu gooyay
fiiladii Internet-ka ee ka go’ay Badda, waxaana shirkadda leh markabkan ay
dalbatay in cadeyn loo keeno arrintan
Markabkan oo lagu magacaabo MSC Alice ayaa taagan dekedda ilaa habeenkii uu go’ay Xariga Internet-ka ee Fibre Opticsoo oo beegneyd ciidii aynu soo dhaafnay.
Muran u dhaxeeya Shirkadda leh Markabka MSC Alice ee loo heysto inuu
Internet-ka jaray iyo dowladda Soomaaliya ayaa ka taagan Dekeda Muqdisho,
iyadoo Markabkan markii uu alaabtii uu siday ku dejiyay Dekeda Muqdisho, lagu
amray in aanu ka dhaqaaqi karin agagaarka Dekeda.
C/raxmaan Diini, Hiiraan Online
[email protected]