Maamulka Khatumo oo ka digay shir la sheegay in lagu qabanayo Buuhoodle
Isniin, July, 10, 2017 (HOL) – Mas'uuliyiinta maamulka Khaatumo ayaa digniin ka soo
saaray shir la sheegay in lagu qaban doono magaalada Buuhoodle ee
xarunta gobolka Cayn.
Masuuliyiintan oo warsaxaafadeed ku
qabtay magaalada Widhwidh oo jaatan xarun u ah maamulka Khaatumo ayaa
waxa ay sheegeen in ay jiraan madax-dhaaameedyo iyo siyaasiyiin ku sugan
Caasimada Soomaaliya ee Muqdisho kuwaas oo sheegay in shir beeleed lagu
wiiqayo maamulka Khaatumo ay sheegeen in lagu qabanayo Buuhoodle.
Gudoomiyaha Baarlamaanka ayaa ugu
horeyn sheegay in ay jiraan siyaasiyiin iyo madaxdhaqameed Muqdisho ka hadlay
oo sheegay in ay shir ku qabanayaan Buuhoodle kaas oo uu tilmaamay in
aanay suuragal ahayn.
"Dadka Xamar ka wada shirarka
ee leh waxaa lagu qabanayaa Buuhoodle shir waxaan leenahay laguma
qaban karo haddii ay isku dayaana wixii ka dhaca iyagaa ka mas’uul
ah" sidaana waxaa yiri gudoomiya baarlamaanka maamulka Khaatumo
Maxamuud Sh Cumar "Sudjayo".
Waxaa kaloo halkaasi ka hadlay
qaar badan oo ka mid ah wasiiro, Xildhibaano iyo waxgarad dhamaantood si
iskumid ah uga soo hor jeestey shirkaa la sheegay in uu ka dhici
doono Buuhoodle.
Shirkan ayaa waxaa xili sanad ku
dhow ka hor iclaamiyey inta badan madaxda dhaqanka ee
degaanada Khaatumo sheegato in ay metesho kaas oo dhawr jeer dib u dhac
uu ku yimid oo ay inta badan abaaro daba dheeraaday ay sabab u ahaayeen.
Waxaan haatan magaalada Muqdisho Ku
sugan madax-dhaqameed iyo in badan oo ka mid ah siyaasiyiintii aasaasay
Khaatumo oo saluug ka muujiyey wadahadalada Khaatumo iyo Somaliland u socda.
Dhinaca kale Wasiirka Arimaha Debeda
Khaatumo Maxamuud Ismaaciil Shabac ayaa ka hadlay shir lagu balansanaa
magaalada Burco oo khilaaf dhaliyey markii Somaliland ay sheegeen in uu
dibudhac ku yimid 14 maalmood taas oo dhinaca Khaatumo diideen kuna
hanjabeen in ay ka baxayaan.
" Waxaan wali ku taaganahay
dhawrista balankii shirka, hadana wadahadal ayaa noo socda" ayuu yiri
Shabac, mana sheegin waqtiga la kulmi doono maadaama maanta ay ahayd maalintii
la balansanaa.
Seynab Cabdi Warsame
[email protected]
Laascaanood G. Sool
