Puntland oo sheegtay in ay dishay 18 ka tirsan xoogagga Al-shabaab
Isniin, July, 10, 2017 (HOL) – Saraakiisha dowlad gobolleedka Puntland ayaa
sheegay in howlgal socday mudo afar cisho ah ku dileen 18 ka tirsan
dagaalamayasha Al-shabaab oo fariisimo ku lahaa Buuraha Galgala ee gobolka Bari.
‘’Waxaan dilnay 18 ka tirsan maleeshiyaadka ah Al-shabaab, kadib howlgal
afar cisho qaatay oo aan ka sameynay buuraha Galgala ayuu yiri’’ Col Maxamed
Ismaaciil oo ka mid ah saraakiisha Puntland.
Dowladda Mareykanka ayaa dhinac tababarada ka caawisa ciidamada Puntland,
lamana oga in in howlgalkaas ay ku lug lahaayeen ciidamo Mareykan ah.
Col Maxamed Ismaaciil ayaa sheegay in howlgalka sidoo kale ay ku qabsadeen
hub iyaga oo dhinaca kalana bur buriyay keydkii raashinka iyo dawada ee ururka
Al-shabaab.
Madaxa howlgalada u qaabilsan Al-shabaab Sheekh Cabdicasiis Abuu-muscad ayaa
sheegay in ay iska caabiyeen weerar uga yimid ciidamada Puntland, waxaana uu
beeniyay sheegashada Puntland ee ah in dagaalyahanno laga dilay.
C/raxmaan Diini,
Hiiraan Online
[email protected]