Jen Jaamac Maxamed Qaalib oo iska diiday xilkii uu u magacaabay madaxweyne Farmaajo
Isniin, July, 10, 2017 (HOL) - Jeneraal Jaamac Maxamed Qaalib ayaa iska diiday xil uu dhawaan u magacabay
madaxweynaha dowladda Soomaaliya Maxamed Cabdullaahi Farmaajo, kaddib
munaasabad ka dhacday magaalada Muqdisho.
Madaxweynaha ayaa u magacaabay Jaamac Maxamed Qaalib guddoomiyaha guddiga
Taakuleynta Qaran ee ciidamada qalabka sida ee Soomaaliyeed.
“Xilkaasi waan ka cudurdaartay mid
aan qaban karo maaha, iyadoo sabab kale la sheegin, anigu himiladeydu waxaa
weeyaan wixii aan taariikh Soomaaliyeed ka garanayo in aan dhallinyarada Jaamacadaha
dhigta u gudbiyo, taana waan ku howlanahay, wax kalena kuma dari karo, marka
waan ka cudur daartay, madaxdana waan u gudbiyey, aniga la igalama tashan mana
aqbalin sababo kale weeye taasi, mar horey la ii weydiiyeyna waan ka
cudurdaartay oo ma qabanayo ayaan ku iri, waxaan filayaa in si qalad ah ay ku
dhacday, haddii iyaguba wax i weydiin in aan wax sheego kuma qasbaneen”
Jen Jaamac Maxamed Qaalib ayaa ka mid ahaa martii ka qeybgashay munaasabada
looga dhawaaqay gudigan, hasse ahaatee waxaa uu ka cudurdaartay xilka uu
madaxweynaha u magacaabay.
Dowladda Federaalka ayaa dadaal ugu jirta dhismaha ciidamo qaran oo hela
xuquuqdooda, iyadoo dowladda ay caqabado ka heystaan arrimo kala duwan oo ay
ugu weyn tahay mushaarka ciidamada oo ku tiirsan gacan shisheeye.
C/raxmaan Diini,
Hiiraan Online
[email protected]
