Dibadbaxyo gilgilay caasimada dalka Turkiga ee Istanbul
Isniin, July, 10, 2017 (HOL) - Dalka Turkiga in
ka badan boqol kun oo dibadbaxayal ah ayaa isugu soo baxay magaalada Istanbul
kadib markii ay maqleen codsiga hogaamiyaha mucaaradka ee dalkaasi Kemal
Kilicdaroglu oo ku baaqay in dib loo soo celiyo cadaalada.
Sawirada telefishenka laga siidaayay ayaa muujinaya tiro badan oo dad ah oo
kor u lulaya calanka Turkiga, waana isusoo bixii ugu weynaa abid ee looga soo
horjeedo madaxweyne Erdogan tan iyo wixii ka dambeeyey inqilaabka la isku dayey
ee dalkaasi ka dhacay sanadkii hore.
Mudaharaadkan ayaa looga soo horjeedaa madaxweyne Rajab Tayib Erdogan,
waxaana lagu tilmaamay "Socodka Cadaallada".
Waxaa uu Mr Kilicdaroglu dhaleeceeyay shaqa ka eryid iyo xarig baahsan ee
daba socday inqilaabkii fashilmay, waxaa uuna isu-soobaxaasi kaga dhawaaqay in
Turkiga uu waa cusub u baryay.
In ka badan Konton kun oo qof ayaa la xiray, halka boqol iyo afartan kun oo
shaqaale ahna shaqada laga eryay ama laga joojiyay tan iyo markii ay qeybo ka
mid ah ciidamada dalkaasi isku dayeen afgembiga.
Dibadbaxan ayaa lagu soo khatimay shan iyo labaatan maalmod, waxayna
dibadbaxayashu socod ka soo billaabeen caasimadda Ankara oo 450 kilomitir u
jirta magaalada Istanbul.
Madaxweyne Erdogan ayaa ku tilmaamay dibadbaxa mid lagu taageerayo
argagixisada.
C/raxmaan Diini,
Hiiraan Online
[email protected]
