Internet ka oo sabab u noqday in qodob ka mid ah jadwalka doorashada madaxweynaha la baabi’iyo
Talaado, Janaayo, 31, 2017 (HOL) - Waxaa laga soo bilaabo 10:00 fiidnimo ee xalay ilaa laga soo gaaro saacadihii hore ee maanta hawada ka maqnaa adeegii Internet-ka Koofurta Soomaaliya, kaasoo saameyn xoog leh ku yeelatay adeegyadiiWarbaahinta, Shirkadaha Xawaadlaha iyo guud ahaanba howlihii kala duwanaa ee xafiisyada dowlada oo intoodaba Internet-ku qeyb ka yahay howlahooda shaqo.
Laakiin marka intaa oo dhan laga soo tago waxaa xusid mudan
in maqnaashaha Internet-ka ee saacadihii hore maanta uu saameyn weyn ku yeeshay
jadwalkii doorashada madaxweynaha Soomaliya, kadib markii lagu fashilmay
qabashada dooddii qorshuhu ahaa in ay isku arkaan musharixiinta madaxweynaha su’aalo
toos ahna soo weydiiyaan dadka Soomaaliyeed ee ku kala nool dalka gudihiisa iyo
dibadiisa.
Qaar ka mid ah musharixiinta ayaa subaxnimadii hore ee
saakay isaga tagay goobtii ay ka dhaci laheyd doodda kadib markii ay ka war
helleen in aan toos looga sii deyn doonin TV-da ku baxa afka Soomaaliga, sababo la
xiriira awooda Internetka oo la sheegay in uu ahaa mid aad u liita.
Guddiga qaban-qaabada doorashada ayaa intaa kadib go’aan ku
qaatay in gabi ahaanba la joojiyay dooddan oo sida ay hadalka u dhigeen markii
horeba iska aheyd mid tijaabo ah oo ku cusub hanaanka doorasho ee Soomaaliya.
Musharixiinta qaar ayaa sheegay in arintan ay u arkaan mid
ula kac ah oo loogu tallagalay in aysan dadku si toos ah ula socon doodda,
iyaga oo ku eedeeyay in ay ka danbeeyeen xubno ka tirsan dowladda.
Laakiin guddoomiyaha guddiga qabanqaabada doorashada
madaxweynaha Dr C/raxmaan Ducaale Beyle ayaa sheegay in baaritaan ay sameeyeen
ku ogaadeen in maqnaashaha Internetka wax xiriir ah la laheyn doodda musharixiinta,
hasse ahaatee aheyd oo kaliya arimo farsamo iyo cilad saameysay xitaa qaar ka
mid ah wadamada dariska.
Ugu danbeyntii, waxaa
muuqata in Internet–ku saameyn weyn oo muuqata ku yeeshay hannaan socodkii
jadwalka doorashada madaxweynaha Soomaaliya oo leysku khilaafay qodob muhiim ah
oo dadku siweyn isha ugu wadda hayeen.