Seminaar lagu xoojinayo manhajka kuliyadaha Jaamacada Banaadir oo la qabtay
Isniin, Janaayo, 31, 2017 (HOL) - Waxaa magaalada Muqdisho lagu soo
gebagebeeyey seminaar ku saabsanaa tayeynta iyo sare u qaadida Manjahyada wax
looga barto qaar ka mid ah kuliyadaha Jaamacada Banaadir oo ka mid ah
Jaamacadaha ugu waaweyn Somalia.
Munaasabada
gebagebada seminaarkan ayaa waxaa ka qeyb galay xildhibaano ka tirsan aqalka
sare ee Baarlamanka Somalia, masuuliyiinta Jaamacadda & Mu’asasada
Banaadir, Macalimiin iyo howlwadeeno ka socday Jaamacada Makerere ee dalka
Ugandha iyo xubno kale.
Seminaarkan
oo socday muddo shan cisho ah ayaa waxaa loo qabtay macalimiinta iyo
hormoodyada shan ka mid ah kuliyaddaha Jaamacada Banaadir, iyadoo
fududeyntiisana ay ka qeyb qaateen Macalimiin ka socotay Jaamacada Makerere.
Guddoomiyaha
Jaamacadda Banaadir Dr. C/risaaq Axmed Dalmar oo ka hadlay gebagebadii
seminaarkan ayaa sheegay loo qabtay illaa shan kuliyadood oo kala ah
Caafimaadka, beeraha, Ingineerinka, xanaanada xoolaha iyo kuliyadda culuunta Caafimaadka,
isagoo xusay in lagu guuleystay ujeedada laga lahaa oo aheyd tayeynta iyo sare
u qaadida manhajyada wax lagu baro ardayda dhigata Kuliyadahan.
“Mudadii
uu socday seminaarkan waxaa lagu tifaftiray manaahijta waxbarashada ee shantaas
kuliyaddood, kuwaasoo laga dhigay manaahij la mid ah, lana tartami kara kuwa
caalamiga ah, waxaana la dhaqan gelin doonaa 11-ka bisha soo socota marka
ardaydu ay fasaxa ka soo laabtaan, kuliyadaha kale ee Jaamacadda iyana seminaar
kanoo kale ah ayaan u qaban doonaa xili fasaxeedka soo socda” ayuu yiri
Guddoomiye Dalmar oo u mahad celiyey ka soo qeyb galayaasha tababarkaas ee ka
socday shanta kuliyadood, Mu’asasada Banaadir oo maalgelisay Mashruucan iyo
macalimiinta ka socotay Jaamacadda Makerere.
Prof.
Cismaan Maxamuud Dufle oo ah Senator ka tirsan aqalka sare ee Baarlamanka
Somalia oo isna munaasabadaas ka hadlay ayaa sheegay inuu ku faraxsan yahay
qabashada seminaarkan oo uu xusay inuu wax looga bedelay Manhajka qaar ka mid
ah kuliyadaha Jaamacada Banaadir.
“Manhajyada
wax lagu baro ardayda waa muhiim in markasta dib ugu habeyn lagu sameeyo si
loogu soo daro waxyaabaha cusub ee aqoonta ku soo kordhay, ulana jaanqaado
manhajyada kale ee Jaamacadaha caalamka” ayuu yiri Prof. Dufle oo u mahad
celiyey dhamaan intii ka qeyb qaadatay taabagelinta howshan culus, isagoo
si gaar ah u xusay macalimiinta Jaamacada Makerere iyo Muasasada
Banaadir.
Hormuudka
kuliyadda Caafimaadka ee Jaamacadda Banaadir Dr. Maxamed Maxamuud Biday oo isna
ku hadlayey magaca kuliyadihiii ka qeyb galay seminaarkan ayaa sheegay in
daraasada lagu sameeyey manaajihta la falan-qeeyey ay aheyd mid aad u qiimo
badan, faaiido badana laga helay.
“Dib
u eegista lagu sameynayo manhajka waxay faaiido u tahay ardayda Jaamacadda,
maxaa yeelay waxaa laga shaqeynayaa tayeynta iyo horumarinta aqoontii ay baran
lahaayeen, waxaana isleeyahay waa markii ugu horeysay ee Jaamacad Soomaaliyeed
ay ku dhaqaaqdo dib u habeynta manaahijteeda waxbarasho” ayuu yiri Dr Biday.
Waxaa
sidoo kale ka hadlay xiritaanka seminaarkan qaar ka mid ah macalimiintii ka
socotay Jaamacadda Makerere oo kala ahaa Prof. Gaddi Ngirane Katashaya, Prof.
John Stephen Tenywa, Drs. Proscovia Mukonzo Namuwenge Drs. Pamela Bakkabulindi,
Mr. Patrick Musinguzi iyo Mr. Salim Kinyiri, waxayna sheegeen iney ku faraxsan
yihiin ka qeyb galka seminaarkan, iyagoo ka waramay faa'iidooyinka tayeynta
manaahijta, waxayna Jaamacadda Banaadir ku amaaneen horumarka ay ku talaabsatay
iyo dedaalka ay ku bixineyso sidii ay u soo saari laheyd aqoonyahano tayo fiican
leh, iyagoo balan-qaaday iney sii wadi doonaan sidii ay Jaamacada ugala shaqeyn
lahaayeen horumarinta aqoonta.
Ugu danbeyntii, seminaarkan ayaa shahaado sharafeedyo lagu
guddoonsiiyey ka qeyb galayaashii seminaarkan ee ka socday shanta kuliyadood ee
Jaamacadda Banaadir iyo macalimiintii ka socotay Jaamacadda Makerere.