Dr Beyle'' waan ka foojignaan doonnaa in ay dhacaan wax ka baxsan nidaamka doorashada madaxweynaha
Isniin, Janaayo, 30, 2017 (HOL) -- Iyadoo marar badan lagu celceliyay in
doorashada madaxweynaha laga ilaaliyo musuq maasuq iyo wax is daba marin ayaa
waxaa arintaa ka hadlay guddiga qaban-qaabada doorashada oo sheegay in aysan
jirin cabsi ay ka qabaan in wax is daba-marin la sameeyo.
Guddoomiyaha gudiga doorashada Dr C/raxmaan Ducaale Beylle ayaa warbaahinta
u sheegay in doorashadu u dhici dooto si cad ah oo ka hufan wax is dabamarin
iyo iyo musuqmaasuq.
‘’Waa u diyaargaroownay arintaa, murashixiintu waxaa ay
horimanayaan xildhibaannada, xildhibaannada warqad ayaa loo dhiibayaa, magaca qofka ay dooranayaan
ayeey soo callaamadeynayaan, sanduuq la wada arkayana waa ay ku ridayaan, marka
halka uu musuqmaasuqa ka soo galli karo annaga ma ogin, wax intaa ka duwan oo dhici karana ma jiro’’
ayuu yiri guddoomiyaha guddiga qaban qaabada doorashada madaxweynaha.
Waxaa uu sheegay in dhamaan mar la eego dadka codsiyada
soo qortay ee u tartamaya xilkan yihiin kuwo buuxiyay sharuudihii looga baahnaa
una qalma sida uu hadalka u dhigay in ay madaxweyne noqdaan, hasse ahaatee
waxaa uu sheegay in cidda kala saareysa yihiin xildhibaannada baarlamaanka
Soomaaliya ee iyaga wax dooranaya.
‘’Bulshada waa ay na aamineen kitaab ayaan ku dhaaranay,
dhaartaa aan galnay annaga oo ka duuleyna waxaan soo saari doonaa qof macquul
ah oo dalkan iyo dadka samatabixin kara’’ ayuu yiri guddoomiyaha gudiga
doorashada.
Hadalka guddoomiyaha guddiga qabanqaabada doorashada ayaa
imanaya xili ay iska soo daba dhacayaan digniin la soo jeedinayo oo la xiriirya
in doorashada madaxweynaha Soomaaliya noqonto mid ku dhacda si xor ah oo xalaal
ah.
C/raxmaan Diini, Hiiraan Online
[email protected]
