Magaalada Cadaado oo ay ka soconayaan kulamo iyo dhaqdhaqaaqyo siyaasadeeed oo iska soo horjeeda
Sabti, Janaayo, 14, 2017 (HOL) – Dhaqdhaqaaqyo siyaasadeed
iyo shirar iska soo horjeeda ayaa lagu waramayaa in ay ka soconayaan magaalada
Cadaado ee xarunta KMG ah u ah maamul gobolleedka Galmudug.
Wariye ku sugan
magaalada Cadaado oo la hadlay HOL ayaa sheegay in ay hotellada magaalada
Cadaado ka soconayaan kulamo gooni gooni ah oo ay leeyihiin xildhibaannada
maamul gobolleedka Galmudug, gaar ahaan xildhibaannadii dhawaan uga
dhawaaqay halkaa in ay codka kalsoonida kala noqdeen madaxweyne Cabdikariin
Xusseen Guulleed.
Hotellada qaar ayaa
lagu arkayaa ciidamo aad u hubeysan oo ilaalo ka haya shirarka halkaa ka socda
oo ah kuwo iska soo horjeeda siyaasad ahaan, madaama xildhibaannada maamulka
Galmudug labo garab u kala jabeen.
Maalintii shalay
ayeey aheyd markii ciidamo ka tirsan nabad-sugida maamulka Galmudug isku
dayeen in ay is hortaag ku sameeyeen kulan mid ka mid ah hoteellada Cadaado ku
yeellan lahaayeen xildhibaannada ka soo horjeeda madaxweynaha, taa oo buuq badan
ka dhalisay magaalada.
Dhinaca kale, waxaa
jira waxgarad iyo odayaal ka soo jeeda deegaanka oo isku dayaya in ay xiisada
siyaasadeed qaboojiyaan, islamarkaana u kala dabqaadaan madaxtooyada iyo
xildhibaannada qaatay go’aanka siyaasadeed, hasse ahaatee dadaaladaa ma noqon
wali kuwo miro dhala.
Wasiirka wasaarada
arimaha gudaha maamulka Galmudug Jaamac Xassan Salaad oo wareegto ka soo baxday
madaxweynaha Galmudug xilkii looga qaaday ayaa dhiniciisa arintaa ku gacan-seyray,
isaga oo sheegay in uusan ogeyn madaxweyne xilka ka qaadi kara, madaama
xildhibaannada codkii kalsoonida kala laabteen.
Ugu danbeyntii,
magaalada Cadaado ayaa guud ahaan laga dareemayaan kacdoon siyaasadeed oo salka
ku haya go’aankii todobaadkii hore ay qaateen 54 xildhibaan oo ka tirsan
barlamaanka Galmudug oo sheegay in ay codkii kalsoonida kala noqdeen
madaxweynaha.
C/raxmaan Diini, Hiiraan Online
[email protected]
