Maamulka gobollada dhexe oo rajo ka qaba baarlamaanka cusub ee Soomaaliya
Jimco, Janaayo, 13,
2017, (HOL) - Maamulka gobollada dhexe ee Ahlu Sunna Waljameeca ayaa si diiran
u soo dhaweeyay habkii ay u dhacday doorashadii maalintii shalay ee lagu soo
dhameystiray guddoonka baarlamaanka Soomaaliya.
Cali Baashi Aadan Faarax oo madaxweyne ku-xigeen ka ah
maamulka gobollada dhexe ee fadhigooda yahay Dhuusa-mareeb, ayaa sheegay in
siweyn ay u soo dhaweeynayaa habkii ay u dhacday doorashadii guddoomiye
ku-xigeennada baarlamaanka, isaga oo si gaar ah diirada u saaray doorashadii
guddoomiye ku-xigeenka koowaad ee looga adkaaday xildhibaan Faarax Sheekh
C/qaadir.
Cali Baashi ayaa sheegay in
baarlamaanka 10aad ee Soomaaliya rajo badan ka qabaan bulshada, isaga oo
rajeeyay in doorashada tan xigta ee madaxweynaha xildhibaannada horseedi
doonaan isbadal ku dhaca sida uu yiri hogaanka sare ee dalka.
‘’Fariinteena waxey tahay in aan ugu baaqeyno guddoonka sare
ee baarlamaanka in ay hoos u eegaan rabitaanka bulshada, waxaan u rajeyneynaa
mustaqbal wanaagsan iyo in umada u horseedaan isbadal, ayuu yiri'' Cali Baashi.
Ugu danbeyntii, waa markii ugu horeysay oo maamulka Ahlu
Sunna uu soo dhaweeyo doorashada dalka ka socta, waxaana xusid mudan in
dhawaan maamulkan gobollada dhexe uu yeeshay baarlamankii ugu horeeyay.
C/raxmaan Diini, Hiiraan Online
[email protected]
