Diblomaasiyiin Imaaraadka ka tirsan oo lagu dilay dalka Afghansitan
Arbaco, Janaayo, 11, 2017 (HOL) - Dowladda Imaaraadka Carabta ayaa xaqiijisay
in shan ka mid ah diblomaasiyiinteeda lagu dilay qarax bam oo Talaadadii ka
dhacay magaalada Kandahar ee koonfurta dalka Afghanistan.
Qaraxaas ayaa waxa guud ahaan ku dhintay 11 qof, ayada oo 16 kalena ay ku
dhaawacmeen, kuwaas oo badankood ahaa saraakiil sare oo ka tirsan dowladda
Afghanistan.
Barasaabka Kandahar Homayun Azizi iyo safiirka Imaaraadka Carabta ee Kabul
Juma Mohammed Abdullah al-Kaabi ayaa ka mid ah dadka ku dhaawacmay qaraxa.
Ra’iisul wasaaraha Imaaraadka, ahna madaxweyne ku xigeenka iyo amiirka
magaalada Dubai Sheikh Mohammed bin Rashid Al Maktoum ayaa sheegay in wax qiil
ah oo diin ama anshax ah aan loo heli karin in la dilo dadka ku caawinaya.
Wasaaradda arrimaha dibedda Imaraadka ayaa talaadadii sheegtay in
safiirkeeda uu magaalada Kandahar u tagy howgal bani aadannimo oo looga gol
lahaa in lagu caawiyo agoonta Afghanistan islamarkaana loogu fidiyo deeq
waxbarasho.
Kooxda Taliban ayaa beenisay inay ku lug lahayd weerarka, waxayna sheegtay
inaysan aasin bamka qarax dhaliyey, ayada oo taa beddelkeed ku eedeysay koox
mucaarad ah oo ka dhisan Kandahar.
Ugu danbeyntii, dowladda Afghanistan ayaa sheegtay in ay Kandahar u direyso
koox baarta qaraxa.
Xigasho VOA
