AMISOM iyo al-Shabaab oo ku dagaalamay Ceelasha Biyaha
Arbaco, Febraayo 08, 2017 [HOL]-AMISOM iyo al-Shabaab ayaa ku dagaalamay Ceelasha Biyaha oo ah deegaan dhaca duleedka Muqdisho.
Xarakada al-Shabaab ayaa wararku waxay sheegeen in ay xalay weerar ku qaaday xero ciidamada AMISOM ay ku leeyihiin Ceelasha Biyaha.
Rasaas xooggan ayaa laga maqlay dagaankaa xalay kadib weerarkaas hase ahaatee cabbaar kadib ayaa rasaastu joogsatay.
Ilaa hada oo aanu warbixintaan qoreyno ayaa waxaan jirin wax faahfaahin ah oo kusaabsan khasaarihii ka dhashay dagaalkaa ka dhacay Ceelasha Biyaha.
Dhanka kale, hoobiyeyaal xalay lagu gamay qeybo ka tirsan Muqdisho ayaan cidi waxba ku noqon.
Hoobiyeyaasha ayaa la ganay ayadoo doorashada Soomaaliya ee madaxweynenimada uu waqti yar ka harsan yahay.
Doorashada ayaa lagu wadaa inay ka dhacdo Afisyoone oo ku dhaggan garoonka diyaaradaha ee caalamiga ah Aden Abdulle maanta.
Wararka qaar ayaa sheegaya in labo hoobiye ay ku soo dhaceen garoonka diyaaradaha ee Aden Abdulle.Mid kale ayaa lagu soo waramay inuu ku dhacay Xamar Weyne.
Sidoo kale ayaa Nambar 4 waxaa laga maqlay qarax weyn ayadoo guud ahaan hoobiyeyaasha dhawaqooda caasimada Muqdisho oo dhan laga maqlay.
Si kastaba ha ahaatee, wararka saaka soo gaaray Hiiraan Online ayaa sheegaya in dheemish ay ahaayeen ee aysan ahayn hoobiyeyaal noolnool.
Dhanka kale waddooyinka iyo meheradaha muhiimka ah ayaa xiran caasimada doorashada darteed si ammaanka loo adkeeyo.
Kumanaan ciidamo ah ayaa waddooyinka lasoo dhoobay si ammaanka loo adkeeyo.
Doorashada ayaan ahayn qof iyo cod balse waxaa madaxweynaha dooranaya xildhibaanada labada aqal ee baarlamaanka Soomaaliya.
Aaden M Warsame
Hiiraan Online
[email protected]
