Doorashada madaxweynaha Soomaaliya oo goor dhaw ka bilaabaneysa magaalada Muqdisho
Arbaco, Feberaayo, 08, 2017 (HOL) - Garoon dhaw oo maanta ayaa la filayaa in ay
ka bilaabato magaalada Muqdisho gaar ahaan xarunta ciidamada cirka ee
Afisiyooni doorashada madaxweynaha Soomaaliya oo ilaa iyo
hada ay u sharaxan yihiin 22 musharax, kadib markii ay tanaasuleen ilaa labo
musharax oo markii hore is diiwaangaliyay.
Guddoomiyaha gudiga qabanqaabada doorashada madaxweynaha
Cabdiraxmaan Ducaale Beyle ayaa sheegay in wax walba diyaar yihiin dhawaanna la
bilaabi doono sidii xildhibaannada iyo martisharafta kale loo gaarsiin lahaa
goobta doorashada.
Amniga magaalada Muqdisho ayaa siweyn loo adkeeyay waxaa la xadiday dhadhaqaaqa
dadka iyo gadiidka caasimada, marka laga reebo gadiidka ay istimcaalayaan
ciidamada amniga sugaya.
Guddoomiye Beyle ayaa sheegay in ay jiraan sharuudo la soo
saaray oo la xiriira bartikoolka goobta doorashada, gaar ahaan waxaa uu sheegay
in la mamnuucay isticmaalka telleefoonka gacanta ee Mobel -ka , isaga oo
sheegay in ay arintaa u sameynayaan sababo la xiriira dhinac amniga.
Marka laga soo tago musharixiinta iyo xildhibaannada labada
aqal ee wax dooranaya ayaa sidoo kale waxaa goobta doorashada tagi doona
wariyayaal Soomaali iyo ajnabi intaba leh, wafuud heer caalami ah iyo goob joogayaal la socon doona hadba
dhaqdhaqaaqa doorashada iyo sida ay wax ku soo dhamaadaan, halka bulshada Sooomaaliyeed inteeda kale kala socon doonaan si toos ah doorashada warbaahinta leyska arko.
Ugu danbeyntii, saacadaha hore ee maanta ayaa la filayaa in
ay bilaabato doorashada, inkastoo laga yaabo in waqti badan ay qaadato sugida
amniga iyo sidii martida kala duwan loo soo dhaweyn lahaa.
Mar walba kala soco Hiiraan Online wararkii ugu danbeeyay
ee doorashada oo hadba idiin soo gudbin doono natiijada doorashada iyo halka ay
wax marayaan.
C/raxmaan Diini, Hiiraan Online
[email protected]