Musharax Faroole oo Doorashada Somalia isaga Haray, kana digay Fara-galinta Shisheeye
Talaado, Feberaayo, 07, 2017 (HOL) –Madaxweynihii hore ee Puntland C/rixmaan Sheikh
Maxamed Faroole ayaa maanta magaalada Muqdisho ka sheegay in uu ka tanaasulay u
tartamid-da doorashada madaxweynaha Somalia oo la filayo in maalinta barri ah
ay ka dhacdo magaalada Muqdisho.
“ Kol hadii ay
musharaxiintii bateen, xildhibaanadii-na wareer ku dhacay ,waxaan soo
jeedinayaa in arintaa wax laga badalo anigaana ugu horeeya oo ficilkaa wax ka
qabanaya ,waxaana maanta go’aansaday in doorashada bari dhacaysa aan si shakhsiyan
ah uga haro “ ayuu yiri C/rixmaan Faroole oo warbaahinta kula hadlay Muqdisho.
“Waxaan ula jeeda in
musharaxiinta kale ee isbadal doonka ah ay isa soo yareeyaan si ay u koobnaato dadka la dooranayo “ ayuu mar kale yiri
Faroole oo ku eedeeyay hogaanka Puntland in ay isu badaleen dad u ololeeya
xubno kamid ah musharaxiinta ka qayb-galaysa doorashada xilli Puntland ay ka jirto abaar daran sida uu sheegay.
Madaxweynihii hore ee
Puntland ayaa wax laga xumaado ku tilmaamay in dowlado shisheeye ay fara –galin
toos ah ku hayaan doorashada Somalia oo
uu sheegay in ay tahay mid ka
hor-imaanaysa madax banaanida dalkan oo ka soo kabanaya colaado sokeeye.
“In Qaran dhisan oo madax banaan doorashadiisi la maamulo oo waliba siyaasad ahaan loo soo dhex-galo iyada oo
musharaxiintii lala kala safanayo, taasi waa wax aan horey loo arag una taal umad-da Somaaliyeed" ayuu xusay Faroole
Faroole oo ka mid
noqonaya musharaxiin dhowr ah oo horey doorashada isaga haray ayaa
xildhibaanada barlamaanka Somalia ugu baaqay in ay fikirkooda badalaan ,isla
markaana aysan codkooda ku bixin qabyaalad iyo jimciyado gooni ah.
Ugu danbayn,C/rixmaan
Faroole ayaa ugu baaqay dowladaha shisheeye in ay faraha kala baxaan masiirka
umadda Somaaliyeed ,isaga oo u mahad-celiyay dadkii kala duwanaa ee ku soo
dhaweeyey magaalada Muqdisho markii uu yimid.
Faysal M. Hassan
[email protected]