Prof Cabdi Ismaaciil Samatar’’ Waxaan ka ilaalineynaa doorashada in lacag loo adeegsado
Isniin, Feberaayo,
06, 2017 (HOL) – Prof Cabdi Ismaaciil Samatar oo madax u ah gudiga anshaxa doorashada
madaxweynaha Soomaaliya ee dhawaan uu magacaabay gudoonka sare ee gollaha
baarlamaanka, ayaa ka hadlay wax qabadka iyo howlaha hor yaalla gudiga, maalinta doorashada
Prof Samatar oo wareysi siinayay Idaacada VOA –da ayaa
sheegay in howsha ugu weyn ee gudigooda hortaala tahay in ay la socdaan
islamarkaana ilaaliyaan anshaxa iyo in doorashadu nadiif ka ahaato musuq maasuq iyo
wax is daba marin.
‘’Shaqada ugu weyn ee na hortaala waa in aan ilaalino marka
hore xalaalnimada codbixinta xildhibaannada, in la xadido dhaqdhaaqaqa goobta
doorashada waqtiga ay codeynta socto iyo aynu si gaar ah ula socono in lacag la
soo galiyo goobta doorashada’’ ayuu yiri Prof Cabdi Ismaaciil Samatar.
Arintan ayaa imaneysa iyadoo ay jiraan tuhunno la xiriira in
musharixiinta qaar lacago xad dhaaf ah u balanqaadayaan xildhibaannada, sidoo kalana waxaa jira shaki laga qabo in marka ugu
danbeysan ee doorashada xarunta la geeyo lacago lagu gadanayo codadka.
Ugu danbeyntii, guddoomiyaha gudiga anshaxa ayaa sheegay in arimahan
oo dhan haddii ay ogaadaan la socodsiin doonaan hay’addaha ku shaqada leh si
markiiba wax looga qabto.
C/raxmaan Diini, Hiiraan Online
[email protected]