Wajigii labaad khudbadaha ilaa 7 musharax madaxweyne oo maanta la soo gabagabeeyay
Sabti, Feberaayo, 04, 2017 (HOL) - Waxaa galabta lagu soo gabagabeeyay xarunta
gollaha shacabka dhageysiga khudbadaha ilaa 7 musharax madaxweyne oo
dhamaantood soo bandhigay wax qabadkooda haddii ay ku guuleystaan xilka
madaxweynaha Soomaaliya.
Musharixiinta maanta baarlamaanka ka hor hadlay ayaa waxaa ka
mid ahaa Dr C/naasir Max’ed Cabdulle, C/raxmaan Cabdishakuur Warsame, C/raxmaan
Sheekh Max’ed Max’uud Faroole, Cadoow Cali Gees, Cabdullaahi Ciilmooge
Xirsi, Cali Caaji Warsame, iyo Cabduqaadir Cosoble Cali.
Dhamaan marka la eego musharixiintan waxaa ay khudbadahooda
ahaayeen kuwo ku saleysan wax ka qabashada arrimaha amniga, dhaqaallaha, wax ka qabashada musuqmaasuqa
iyo tayeeynta hay’addaha dowladda, sida garsoorka iyo waliba sharci dajinta.
Maalinta beri oo ah Axad taariikhdu ku beegan tahay 5 February ayaa lagu
waddaa in la soo gabageeyo khudbadaha musharixiinta, iyadoo maalinta Isniinta
ahna loo balansan yahay dood ay yeelan doonaan xubnaha u taagan xilka
madaxweynaha Soomaaliya.
Ugu danbeyntii, Arbacada soo socota oo ah
8 bishan ayaa sidoo kale ah maalinta loo ballansan yahay doorashada madaxweynaha.
C/raxmaan Diini, Hiiraan Online
[email protected]