Roobab ka curtay qeybo ka mid ah gobolka Sool
Sabti, Feberaayo, 04, 2017 (HOL) - Dhowr
meelood oo ka mid ah Gobolka Sool ayaa roobab ka curteen xili lagu jirey abaar
aad u adag oo kumanaan qoys dhamaysay xoolihii ay haysteen halka qaar kalena ay
u guureen degaano ku teedsan badweynta Hindiya ee gobolada Barri iyo Nugaal.
Degmada Xuddun ayaa ugu horeysey
halkii dhibic roob ee ugu horeysey ay ku tiixday gabalgaabkii Shalay sida uu
HOL u sheegay Maxamed Jaamac Mahad.
"Dhawr meelood oo ay ka mid
yihiin Duska, Darayo-Hayaag, Kulaal iyo Buuraha barri kaga aadan magaalada ayaa
hoglo khafiif ahi ka curteen, laakiin maaha roob wax lagu sheego waxaase farxad
ah dhibicda biyood ee cirka ka soo dhacday iyadoo lagu jiro Jiilaal
ubucdii" ayuu yiri Maxamed.
Magaalada Laascaanood ayaa maata
daruuro biyaysan duljoogeen kuwaas oo inay da'ayaan u muuqda, inta badana ma
jirto wax qorax ah oo la arkayaa.
Xidhiidh aan la samaynay degaano
badan oo gobolka ka tirsan oo Taleex, Boocame, Qoriley ka mid yihiin ayaa waxay
noo sheegeen in nayaayiro wacan ay qabaan jawiguna uu isbedeley dadkuna ay
sugayaan naxariista Rabbi.
Si kastaba ha ahaatee quus xoog
badan oo haysata bulshada Soomaaliyeed gaar ahaan kuwa Dooxada Nugaaleed
ku nool oo dhawr sano roobab wacan aan helin ayaa maanta Farxad ka
muuqataa iyagoo aad maqlayso su'aalo ay is weydiinayaan ku saabsan curashada
cirka iyo isbedelka cimilada.
Seynab Cabdi Warsame
[email protected]
Laascaanood G. Sool
