Gollaha amaanka QM oo ka hadlay go’aankii madaxweynaha Mareykanka Donald Trump
Sabti, Feberaayo, 04, 2017 (HOL) - Golaha ammaanka ee Qaramada
Midoobay ayaa kulan ay yeesheen waxa ay kaga hadleen xaalada hada ay ku sugan
yihiin wadamada qaar ee ku yaalla Qaarada Afrika.
Kulanka oo intiisa badan diirada lagu saarayay amniga dalalka Afrika ayaa
waxaa lagu soo hadal qaaday go’aankii Madaxweynaha cusub ee dalka Mareykanka
Donald Trump, kaas oo ku aadanaa in 7 dal oo Islaam ah dadkooda uu ka mamnuucay
tagista dalka Mareykanka.
Golaha ammaanka ee QM ayaa waxa ay sheegeen go’aanka Trump in uu yahay mid
aan loo meel dayin, loona baahan yahay in gacan la siiyo dadka dalalkooda ka
soo cararaya ee aan ku heysan nabad gelyo buuxda.
Sidoo kale Golaha ammaanka ayaa waxa ay ka digeen khatarta ka dhalan karta
go’aanka Donald Trump, oo ah mid isugu jira midab takoor, Islaam naceyb, iyo
waxyaabo kale, iyagoo sidoo kale sheegay in hada ay sii badan karaan falaka la
xiriira amni darada.
Donald Trump Madaxweynaha cusub ee dalka Mareykanka ayay ugu baaqeen in uu
ka laabto go’aankan oo uu dib u eegis ku sameeyo, si dadka hakadka uu galay ay
u gaaraan Mareykanka, kuwa joogana walaaca haya uu u daayo.
Madaxweyne Donald Trump ayaa dalalka Iran, Iraq, Libya, Somalia, Sudan,
Syria iyo Yemen dadkooda dhowaan ka mamnuucay gaar ahaan qaxootiga iyo kuwa aan
heysan sharciga in ay gudaha galaan dalka Mareykanka, taas oo uu mar marsiyo
uga dhigay in ay yihiin kuwo abuuraya argagixisanimo iyo amni daro.
C/raxmaan Diini, Hiiraan Online
[email protected]
