Doorasho ku celis ah oo maanta lagu waddo in ay ka dhacdo magaalada Muqdisho
Sabti, Feberaayo, 04, 2017 (HOL) –
Maanta ayaa lagu waddaa in magaalada Muqdisho lagu qabto doorashada mid ka mid
ah kuraastii horay doorashadooda uga dhacday magaalada Jowhar, kaa oo gudiga
xalinta khilaafaadka ku soo dareen shan kursi oo lagu eedeeyay in lagu soo
doortay hab musuqmaasuq ah.
Kursigan ayaa ah kursi xildhibaannimo ee beesha Jidle, waxaana doorashadii
horay uga dhacday Jowhar ku soo baxay wasiirka dhalinyarrada iyo cayaaraha
xukuumada waqtigeedu dhamaaday Max’ed Xassan Nuux.
Guusha wasiir Nuux ayaa lagu tilmaamay in ay aheyd mid aan hab sharci ah ku
imaan, madaama horay gudiga heer federaal uga joojiyeen in uu
doorashada ka qeyb-gallo, laakiin markan waa loo ogol yahay in uu u tartamo doorashada
ku celiska ee ka dhaceysa Muqdisho.
Ilaa iyo hadda waxaa dib loo soo doorto saddex kursi oo ka mid ah 5tii
kursi ee dib loogu celiyay maamul gobolleedyada Puntland, Galmudug, iyo
Baydhabo waxaana dhamaantood ku soo baxay xubnihii horay loo diiday
natiijadooda doorasho.
Dhinaca Jubbaland marka la eego wali waxaa hakad uu ku jira dib u soo
doorashada kursigii horay loogu murmay ee ka midka ahaa kuraasta la maray in
doorashadooda lagu celiyo, kadib markii leysku mari waayay wareegii hore
doorasho ka dhacday magaalada Kismaayo taasoo keentay in gudiga doorashada heer
dowlad gobolleed hakad galiyeen.
Ugu danbeyntii, lama oga in
doorashada maanta ka dhaceysa magaalada Muqdisho ku soo bixin doono wasiir Nuux iyo in
shaqsi kale oo cusub la dooran doono.
C/raxmaan Diini, Hiiraan Online
[email protected]