Xildhibaanno ku shiray magaalada Muqdisho oo dalbaday isbadal dhinaca hogaanka ah
Khamiis, Feberaayo, 02, 2017 (HOL) -- In ka badan 170 oo caawa kulan ku yeeshay
hotelka Jaziira ee magaalada Muqdisho ayaa ka wada hadlay marxalada uu dalka
marayo iyo doorashada madaxweynaha ee la filayo in ay dalka ka dhacdo.
Kulanka oo ahaa mid ay tallo isku dhaafsadeen
xildhibaannadii ka qeyb-gallay ayaa dhamaanba xubnihii ka hadlay waxaa ay ku
dheeraadeen xalaada guud ee dalka iyo marxaladihii kala duwanaa ee la soo maray
mudadii afarta sanno aheyd ee la soo dhaafay, iyaga oo dhinaca kalana isla
gartay baahida loo qabo is badal dhinac hogaanka ah.
Shirkan oo ay ka qeyb-galleen xildhibaano oo kaliya ayaa
waxaa ka dhax muuqday mudanayaal muddo dheer ku soo jiray baarlamaanka, kuwaa oo sheegay in
xiligan ay hortaalo howl Qaran oo u baahan in loo guto si hufan, iyadoo la eegayo sida ay hadalka u dhigeen
baahida bulshada Soomaaliyeed ay u qabaan in la helo hogaan daacad ah.
Maata ayeey aheyd markii ilaa 7 musharax oo u taagan xilka
madaxweynaha Soomaaliya ay khudbadahooda ka jeediyeen baarlamaanka, kuwaa oo
mid walba oo ka mid ah soo bandhigay wax qabadkiisa haddii uu ku guuleysto
xilka madaxweynaha Soomaaliya.
Kulamada iyo shirarka xildhibaannada ay yeellanayaan ayaa
waayadii ugu danbeeyayba ka socday magaalada Muqdisho, hasse ahaatee shirkan
ayaa u muuqday mid xildhibaannadii ka qeyb-gallay isku aragti ka ahaayeen sida loogu baahan in is badal lagu sameeyo hanaankii siyaasadeed ee dalka waa sida ay xildhibaannada hadalka u dhigeen.
Ugu danbeyntii, doorashada madaxweynaha Soomaaliya oo ah mid
dadka Soomaaliyeed siweyn isha ugu wada hayaan ayaa loo balansan yahay 8bishan
Feberaayo maalmo uun ay naga xigaan.
