Guddiga qabanqaabada doorashada madaxweynaha oo sheegay in la qabanayo dooddii musharixiinta
Khamiis, Feberaayo, 02, 2017 (HOL) – Guddoomiyaha gudiga
doorashada C/raxmaan Ducaale Beyle ayaa mar kale sheegay in leysku afgartay in
dib loo qabto dooddii musharixiinta xilka madaxweynaha, oo markii uu lagu
dhawaaqay in gabi ahaanba la joojiyay.
Guddoomiyaha ayaa sheegay in arintaa go’aankeeda gaareen
gudiga doorashada madaxweynaha, madaama daruuftii markii hore loo baajiyay dooda
laga baxay, islamarkaana Internet –kii xoogiisa uu soo laabtay.
‘’Waxaa nalagu qanciyay wada hadalo badan oo aan yeellanay
kadib in Internet –kii sax yahay oo awoodiisii soo laabtay dooddiina loo baahan
yahay in la qaban karo, sidaad ogtihiin
markii aan jadwalka sameynay waxaan ku soo darnay maalmo dheeraad ah oo ay
haddii ay wax soo baxaan lagu baxsan karo, sidaa daraadeed waxaan isku
afgaranay in 06 bishan Feberaayo oo ku beegan Isniinta soo socta la qabto
dooddii musharixiinta’’ ayuu yiri guddoomiyaha gudiga doorashada madaxweynaha.
Gudoomiyaha gudiga doorashada C/raxmaan Ducaale Beyle ayaa
horay u sheegay in gabi ahaanba jadwalka laga saaray qodobka ku saabsan doodda
musharixiinta kadib markii leysku khilaafay, hasse ahaatee waxaa arintaa ku
gacanseyray oo diiday musharixiinta xilka madaxweynaha oo sheegay in guddigu
awood gaar ah u laheyn in uu badalo qodob ka mid ah jadwalka doorashada.
Ugu danbeyntii, waxaa
muuqata in gudiga uu ku qancay soo jeedintii musharixiinta oo ku adkeystay in la
qabto doodda kana soo qeyb-galaan warbaahinta madaxabanaan.
C/raxmaan Diini, Hiiraan Online
[email protected]