Maxkamada ICJ oo maanta go’aan ka gaareysa dacwada badda Soomaaliya iyo Kenya
Khamiis, Feberaayo, 02, 2017 (HOL) -- Maxkamadda Caalamiga ah ee Caddaaladda
(ICJ) ayaa Maanta lagu Wadaa in ay ku dhawaaqdo go’aanka ay ka gaartay diidmada
hordhaca ah ee Kenya ee ku saabsan dacwadda Soomaaliya ay ku dalbeyso in la
cayimo soohdinta badeed ee u dhaxeysa Soomaaliya iyo Kenya.
Sida Soomaaliya ay dooneyso, haddii ay Maxkamaddu go’aan ku gaarto in ay
dacwaddan hadda gasho waxay noqon doontaa in Kenya la siiyo wakhti ay ku
diyaariso waxa ay isaga daafaceyso kiiska ay Soomaaliya ku oogtay Kenya.
Wafdi ka socda dowladda Soomaaliya oo uu hoggaaminayo xeer ialaaliyaha
Qaranka Axmed Cali Daahir, Danjiraha Soomaaliya u fadhiya Brussels, Dr.
Cali Faqi wakiilka Soomaaliya ee dacwadda ayna wehliyaan
Danjirayaal dhowr ah iyo Muna Sharmaan oo ah Qareen Soomaaliyeed oo dacwaddan
billowgeedii ilaa iyo hadda gacanta ku haysa sumcadna uga kasbatay Soomaali
badan.
Galabta saacaddu marka ay tahay 5-ta Galabnimo wakhtiga Soomaaliya ayaa
Guddoomiyaha Maxkamadda ICJ, Ronny Abraham, uu ku dhawaaqi doonaa go’aanka
Maxkamadda.
Soomaaliya ayaa dacwadda u gudbisay Maxkamadda ICJ sannadkii 2014. Kenya
waxay iyaduna Maxkamadda u gudbisay diidmo ay dooneyso in ay Maxkamadda ka hor
istaagto in ay qaaddo dacwadda.
Ugu danbeyntii, Badda ay isku haystaan Soomaaliya iyo Kenya ayaa
bedkeedu yahay 142,000 km oo laba jibbaaran, Waxaana la rumeysan yahay
aagga badweynta India ee ay Soomaaliya iyo Kenya ay lahaashaheeda ku muransan
yihiin in uu ku jiro kheyraad badan oo dabiici ah oo uu ka mid yahay shidaal.
