Dagaal ciidamada Puntland iyo kooxo hubeysan xalay ku dhaxmaray magaalada Boosaaso
Khamiis, Feberaayo, 02, 2017 (HOL) -Inta la og-yahay labo ruux oo shacab
ahaa ku dhintay laba kale oo ka tirsan
ciidamada Puntland-na dhaawac ayaa soo gaaray, kadib marki kooxo hubeysan ay
weerareen xalay sagaalkii fiidnimo Bar koontarool oo ku taala dhinaca koofureed
ee magaalada Boosaaso.
Dad ku sugan Boosaaso ayaa VOA-da u sheegay in ay maqleen rasaas culus oo ay is weydaarasanayeen
kooxaha weerarka soo qaaday iyo ciidamadii ku sugnaa Bartakoontarool ee la
weeraray.
Saraakiisha maamulka Puntland oo ay VOA la xariirtay ayaa shegay in ay
baxsadeen raggii weerarkaasi geystey oo ay saraakiishu sheegeen in qaar ka mid
ah la dhaawacay.
Dilal qorsheysan iyo weeraro gaadma ah ayaa maalmihi dhawaa ka dhacay
Boosaaso, waxaa intooda badan sheegtay koox sheegatay ineey xiriir la leeyihiin
kooxda Daacish.
Maalintii shalay ayeey aheyd markii uu soo baxay warka ku saabsan in
deegaanka Karin oo ka mid ah gobolka Bari lagu arkay saddex ruux oo la gowrcay oo loo
maleynayo in ay ka tirsanaayeen shan ruux oo todobaadkii hore ay qafaasheen
maleeshiyaad la tuhusan yahay in ay ka tirsan yihiin kooxda uu hogaamiyo Sheekh
C/qaadir Muumin ee sheegta in ay ka tirsan yihiin kooxda Daacish.
C/raxmaan Diini, Hiiraan Online
[email protected]