Booliiska Cadaado oo gacanta ku dhigay nin kufsi u geystay gabar Lix sano jir ah
Arbaco, Feberaayo, 01, 2017 (HOL) – Ciidamada
booliiska magaalada Cadaado ayaa gacanta ku dhigay askari ka tirsan militariga
ciidamada xoogga dalka Soomaaliyeed gaar ahaan qeybta 21aad oo ku eedeysan in
uu kufsi u geystay gabar Lix sano jir ah.
Cumar Macalin oo ah taliyaha saldhiga booliiska degmada Cadaado oo
warbaahinta kula hadlay xafiiskiisa ayaa sheegay in ay gacanta ku dhigeen ninkan
oo ka tirsanaa ciidamada militariga, isaga oo intaa ku darray in gabadhan lagu
kufsaday guri ku yaala dulleedka magaalada Cadaado.
“Gacanta ayaa ku heynaa danbiilihii
falkaa u geystay gabadha yar ee aan waxba garan, danbiilaha gabadha ayaa
sheegtay kadib markii 30 nin ay ka soo dhax saartay, waa uu xiran yahay
sharciga ayaana la horkeeni doonaa’’ ayuu yiri taliyaha.
Muuqaal laga baahiyay TV ku hadla afka Soomaaliga ayaa laga arkayay gabadha
yar oo farta ku fiiqeysa shaqsiga falka ku kula kacay xili uu ka mid ahaa rag
badan oo goobta leysugu keenay.
Ugu danbeyntii, kiiskan ayaa noqonaya kii ugu horeeyay ee noociisa ah oo
laga soo sheego gobollada dhexe marka loo eego da’da gabadha la sheegay in la
kufsaday oo ah gabar aad u yar.