Xarunta Xuquuqul Insaanka Somaliland oo dalbatay in la siidaayo laba Wariye oo Somaliland ku xiran
Axad, December, 17, 2017 (HOL)- Xarunta xuquuqal Iinsaanka ayaa
xukuumada Somaliland ugu baaqday inay xoriyadooda u soo celiso laba suxufi oo
ku kala xidhan magaaladda Hargeysa iyo Gabiley.
Warsaxaafadeed ka soo baxay
xarunta xuquuqal Iinsaanka oo uu ku saxeexan yahay gudoomiyaha xaruntaasi
garyaqaan Guuleed Axmed Jaamac ayaa ugu baaqay in loo baahan yahay in
xukuumaddu sii deyso weriyeyaashaasi.
“Cabdirisaaq Dayib Cali oo ka
tirsan shabakadda wararka ee Haldoornews waxaa la xidhay 5tii December 2017
iyada oo la hor keenay Maxkamadda Gobolka Gabiley 7 December. Maxkamaddu waxay
rumaan garaysay todobo cisho.”ayaa lagu sheegay war-saxaafadeedkan.
Waxaana intaas lagu daray “Waxa
lagu eedaynayaa waraysi lagu daabacay shabakadda Gabileynews.net. Waraysigaas
oo gabadhi ay eedo ugu jeedisay duqa Gabiley, siday ay u xaqiijiyeen Xarunta
saraakiil dawladeed iyo Maxamuud Cabdi Jaamac, gudoomiyaha ururka suxufiyiinta
ee SOLJA.
Cabdirisaaq wuxuu u sheegay Xarunta
inaanu isagu daabicin oo qaadin waraysigaas oo aanu waxba ku qorin
shabakaadaas. Sida uu sheegay, Cabdirisaaq wuxuu sameeyaa shabakadaha
(websites) kadibna wuxuu ku wareejiyaa cidda leh. Sidaasdarteed, wuxuu sheegay
inuu isagu sameyeey bogga balse aanu lahyn oo maamulin, wuxuu weli ku xidhan yahay xabsiga Gabiley.”.
Waxa kale oo uu ka hadlay wariye
kale oo isna ku xidhan magaaladda Hargeysa, waxaanu yidhi “ 8 October 2017 waxa
Maxkamada Gobolka Hargeysa ay ku xukuntay suxufi Maxamed Adan Dirir 18 bilood
oo xabsi ah. Qareenkiisa iyo qoyskiisa midna ma joogin dacwadda, sida uu noo
sheegay qareenkiisa Mubaarig Cabdi.
Dirir waxa la xidhay 16 September 2017 iyada oo lagu eedeyey cay iyo
daabacid war been abuur ah oo la xidhiidha qoraalo la sheegay inay ku eedeyeen
dugsiga gaarka loo leeyahay ee Noradin in falal anshaxa ka baxsan loola dhaqmo
hablaha. Dhegaysiga rafcaan uu qaatay Dirir ayaa mudaysan Arbacada soo socota,
20 December 2017. Waxaanu madaxwaynaha cusub, Mudane Muuse Biixi Cabdi, ka
codsanaynaa inuu xoriyadooda u soo celiso suxufiyiiintaas xidhan. Waa waajib ay
dastuurka iyo xeerarka caalamiga ahi saarayaan dawladda inaan la cabudhin
warbaahinta.”
Barkhad-ladiif M. Cumar,
Hiiraan Online
[email protected]
Hargeysa, Somaliland.
