DDSI oo ku eedeysay Oromada in ay Xasuuqeen Soomaali Maxaabiis ah
Axad, December, 17, 2017 (HOL) – Maamulka
dowlad degaanka Soomaalida ee dalka Itoobiya ayaa markii ugu horreysay ka
hadlay dadkii habeen hore Dowlad deegaanka Oromadda ay ku laayeen Tuullada
Gadule ee hoostagta deegaaanka Darullow ee Ismaamulka Soomaalida dalka
Itoobiya.
Dilka dadkan ayaa wuxuu ka
dambeeyay, kaddib markii ciidamada Liyuu Boolis-ku weerareen deegaan aan Gadule
ka dheerayn halkaa oo la sheegay in ay ku dileen Labo ruux.
Reerka laga dilay labada ruux
oo ka carooday falkaasi ayaa weerar qorsheysan waxaa ay ku qaadeen Soomaalida
ku nool degaanka Gadule, iyaga oo dilay ilaa 65 ruux oo Soomaali ah.
Madaxa xafiiska Arrimaha Dowlad
deegaanka Soomaalida Itoobiya, Idiris Ismaaciil ayaa sheegay in dadkaasi
markii la laayay kaddib lagu riday meel God ah.
Waxaa uu sidoo kale tilmaamay in
dadka la dilay ay ahaayeen dad Maxaabiis ah oo horay gacanta ugu jiray maamulka
Oromadda.
Idiris Ismaaciil ayaa sidoo kale
xusay in Oromadda ay dileen ku dhawaad 70 ruux, islamarkaana ay qaadi doonaan
tilaabo looga jawaabayo dhibka dhacay.
Xiisad culus oo dilkan ka dhalatay
ayaa ka taagan deganadii dilalka ay ka dhaceen, waxaana laga cabsi qabaa
dilalka inay intaan ka sii bataan, iyadoo aargoosi laga duulaayo.
Dowladda Itoobiya ayaa la sheegay
inay hawada ka saartay xiriirka Baraha Bulshada, si xiisada arintaan ka
dhalatay aysan cirka isugu sii shareereen, waxaana goobaha dilalka ka dhaceen
loo diray ciidamo badan oo Itoobiyaan ah.
Soomaalida ku nool Ismaamulka
hoostagga Oromada dalka Itoobiya ayaa waxaa soo food saaray xaalad cabsi ah oo
la xiriirta dilalkan dhacay iyo inay ka cabsi qabaan in ay sii socdaan.
C/raxmaan Diini, Hiiraan Online
[email protected]
