La taliyaha amniga Qaranka ee DF Soomaaliya oo sheegay in si qaldan loo fasiray qorshaha dhismaha ciidamada
Arbaco, April, 26, 2017 (HOL) -La taliyaha
amniga Qaranka ee Madaxweynaha Soomaaliya Xusseen Macalin Maxamuu sheegay in
fasiraad aan sax aheyn ama qaldan laga bixiyay sida uu hadalka u dhigay
qorshaha dowladda ee dhismaha ciidamada Qaranka.
Xuseen Macalin ayaa sheegay in ciidanada xooga dalka
Soomaaliyeed ay yihiin geesiyaal u soo dhabar adeygay difaaca dalka iyo
badbaadada shacabka Soomaaliyeed, ayna intooda badan ay muddo ka badan 10 sano heegan
joogta ah ugu jiraan furumaha dagaalka.
“Dowladda federaaka waxaa ka go’an in ciidamada helo daryeel, qalabeyn iyo in ay
helaan dhammaan xuquuqdooda aasaasiga ah, mana jiro wax saameyn ah oo ciidankan
howlgalaya ay ku yeelaneyso Qorshaha Amniga Qaranka oo ujeedadiisu tahay sidii
loo dar-dargelin lahaa tayeynta cidianka Soomaaliyeed”ayuu yiri la taliyaha
amniga ee madaxweynaha.
Waxaa uu meesha ka saaray inay jiraan qorshe lagu
kala dirayo ciidanka xoogga dalka, isla markaana fasiraad aan sax aheyn laga
bixinayo qorshaha amniga Qaranka sida uu yiri.
“Haba yaraatee ma jiraan qorshe lagu kala dirayo
ciidanka XDS oo aan aragnay in fasiiraad aan sax aheyn laga bixinayo, taaaso
aan waafaqsaneyn Qorshaha Amniga Qaran, dowladda Federaalka waxay sii
xoojineysaa howlaha cidianka Xoogga dalka, mooyee ma dhici karto wax dalka dib
u celiya”ayuu yiri la taliyaha amniga Qaranka.
Si shacabka ay u fahmaan dooda Qorshaha amniga
Qaranka waxaan halkan hoose ku soo gudbineynaa sida uu u qoran yahay arrinka ku
saabsan ciidamada:
Ciidamada xoogga dalka Soomaaliyeed (XDS) waxaa uu ka
kooban yahay;
• Ciidanka Lugta
• Ciidanka Cirka
• Ciidanka Badda
Waajibaadka ciidanka XDS waa;
• Ilaalinta midnimada Qaranka
• Illaalinta iyo difaaca xuduudaha dalka
• Difaaca cadawga dibadda iyo kan gudaha oo u abaabulan qaab hubaysan oo
Khatar galiyaan xasiloonida dalka
Hadalka la taliyaha amniga Qaranka ee madaxweynaha ayaa imanaya xili arintan ay buuq siyaasadeed ka dhax abuurtay xukuumada iyo xildhibaannada oo mooshin arintan ka dhan ah horgeeyay baarlamaanka, iyaga oo ku tilmaamay qorshaha dhismaha ciidamada mid qatar ku ah Qarannimada.
C/raxmaan Diini, Hiiraan Online
[email protected]
