Madaxweyne ku xigeenka oo xariga ka jaray biyo xireen weyn oo laga hirgaliyey bariga magaaladda Hargeysa
Talaado, April, 25 2017 (HOL)- Madaxweyne ku xigeenka
Somaliland, Cabdiraxmaan Cabdilaahi Ismaaciil Saylici, ayaa shalay dhagax
dhigay mashruuca weyn oo biyo
xidheen oo uu imaaraadka Carabtu maalgalisay, taas oo laga hirgaliyey
deegaanka Xumbo weyne ee bariga magaaladda Hargeysa.
Munaasibad balaadhan oo madax
badan ka soo qaybgalay ayaa lagu qabtay deegaanka laga fulinayey mashruucan
biyo xidheenka ah oo si weyn looga faa’iidaysan doono, isla markaana kayd u
noqon doono wakhtiyadda abaaruhu dhacaan, waxaana looga faa’iidaysanayey
biyihii sanad walba dhaafi jiray ee badaha ku shubman jiray.
"Maanta waa maalin weyn oo
aynu guddoomayno deeq aad u qiimo badan oo inooga timi walaalaheena dalka Imaaradka carabta waxaan u
mahad celinaynaa Madaxwayanaha dawlada imaaradka Sheekh Khaliif binu Saayid Al
Nahyaan iyo walaalihiisa hawshan hareeraha la haya iyo hay'ada lasoo marshay
dhaqaalahan ee khaliifa foundation qiimaha uu inoogu fadhiyaa waxa weeye, waa
biyo xidheenkii koowaad ee dalka laga sameeyo maalintii Madaxweynuhu dhagax
dhigayay dadka qaar riyo ayay la ahayd riyadii ayaa rumawday biyo la qabtayna
qasaaro ma leh oo marka ay ugu yartahay intaasoo xayawaana oo qaar aynu dhaqano
iyo kuwo kaleba ayaa ku noolaanaya oo horta biyo la qabtay qasaaro ma leh”ayuu
yidhi madaxweyne ku xigeenku Saylici.
Sidoo kale, waxa isaguna halkaasi
ka hadlay wasiirka madaxtooyadda Mudane Maxamuud Xaashi Cabdi waxaanu yidhi
" waxay bilaw u tahay inaynu baranno biyaheena faha badan ee socda inaynu
qabano oo ka faa'idaysano waxa ina naafeeyay oo ina tabaaleeyay abaaro soo
noq-noqda waxaynu helnaa biyaha laba wakhti oo kaliya inta badan cimilada
duniduna si xun ayay isu badashay marka la eego biyaha Somaliland ku dhaca
labadaas wakhti aqoonyahanaada ku xeesha dheeri markii ay qiimeeyeen maaha biyo
yar waa biyo aad u farabadan oo inagu filan waxa dhulka hoostiisa gala iyo waxa
bada gala waxay inooga baahan tahay caqli iyo xigmad kuma noolaan karno
noloshii awoowyaasheen markay geela, Lo'da iyo Adhiga dhaqan jireen say u
noolaayeen shan qarni ama afar qarni ka hor maanta uma noolaan karno noloshii
iyo dunidii oo dhan ayaa is badashay
cimiladii ayaa is badashay reer magaal ayaynu u badannay dad badan oo
aqoon lehna weynu yeelanay miyigiina waa laga soo gurmayaa waxaynu u baahan nahay
inaynu nolosheena jihayno.”
Sidoo kale,waxa iyaguna halkaasi
ka hadlay gudoomiyaha xisbiga UCID, Faysal Cali Waraabe, madax ka socotay
hay’ada khaliifa Foundation ee Imaaraadka Carabta.
Barkhad-ladiif M. Cumar,
Hiiraan Online
[email protected]
Hargeysa, Somaliland.