SOMALILAND: Wakiilada oo Ansixiyay in la kala qaado Doorashada Wakiilada & Madaxweynaha
Sabti, September 17, 2016 (HOL) —
Golaha Wakiilada Somaliland, ayaa cod Aqlabiyad ah ku ogolaaday
maanta go’aankii madaxweyne Siilaanyo ku kala saaray labadda doorasho ee Madaxtooyada
iyo Golaha Wakiiladda, isla markaana doorashada Baarlaanka dib loo dhigay
wakhtigii qorshuhu ahaa inay wada dhacaan.
Kalfadhigaan maanta Waxaa
shir-guddoominayey gudoomiye kuxgeenka kowaad ee golaha Baashe Maxamed Faarax,
waxaanu Cod Gacan-taag ah galiyay in la kala Qaado Labada doorasho ee markii
hore is barkanaa ee madaxtooyada iyo Wakiiladda.
Kalfadhigan waxa ka soo
xaadiray 59 xildhibaan, waxaana ogolaaday in la kala qaado 52 xildhibaan, halka
shan xildhibaan diideen, hal xildhibaana ka aamusay, gudoomiyuhuna aanu codeyn.
Baashe Maxamed Faarax oo
markii codeyntu dhacday warbaahinta la hadlay ayaa sheegay in go;aankan golaha
ka soo baxay loo gudbin doonno maxkamadda sare, ka dibna golaha Guurtiddu
qiimeyn doonaan wakhtiga ugu haboon ee doorashadan Wakiiladdu dhici doonto,
maadaama oo golaha GUurtiddu awood u leeyihiin inay goleyaasha u kordhiyaan.
Guddoomiyaha golaha
Wakiiladda C/raxmaan Maxamed C/laahi Cirro ayaa isago saaka ka baaqday oo aan
iman Kal-fadhiga, inkastoo uu magaalada joogay, Laakiinse Wararka ayaa sheegaya inuu ogaa in xildhibaanadu doonayaan in loo kordhiyo, taasina ay ka
hor imanayso siyaasadda xisbigiisa Wadani, sidaas darteed uu go;aansaday in
aanu golaha iman.
Ugu dambeyntii, Xildhibaannada Golaha
Wakiiladda ayaa hore Dadaal ugu jiray in la kala saaro, isla markaana loo
kordhiyo, waxaana hore dhawr jeer golaha Guurtiddu u kordhiyaan golaha
Wakiiiladda.
Barkhad-ladiif M. Cumar,
Hiiraan Online
[email protected]
Hargeysa, Somaliland
