Madaxweynaha: Shacabka Hiiraan iyo Sh. Dhexe waa inay Dhistaan Maamulkooda (SAWIRRO)
Jimco, September 16, 2016 (HOL) —
Madaxweynaha Soomaaliya, Mudane Xasan Sheekh Maxamuud,
ayaa ka sheegay Degmada Jowhar ee Gobolka Shabeellaha Dhexe in Shacabka Hiiraan
iyo Shabeellda Dhexe ay Dar-dar-geliyaan dhismaha maammulkooda.
Xasan Sheekh, ayaa sheegay
in shacabka labada gobol oo muddo sagaal bilood ah shir uga socday Jowhar looga
fadhiyo inay soo dedejiyaan dhismaha maamul ay ku mideysan yihiin oo ka
shaqeeya danahooda, maamulkaasna uu noqdo mid rabitaan shacab ku yimaada.
“Doorka Dowladda FS ee
dhismaha nidaamka federaalka waa fududeynta, sharciyeynta iyo inay goobjoog ka
noqoto sida loo fulinayo hannaankan, sidaa darteed waxaa halkaa ka cad in
shacabku xor u yihiin inay rabitaankooda ku soo dhisaan maamulka ay doonayaan,
soona doortaan xubnaha ugu macquulsan ee ay doonayaan inay danahooda matalaan,’’
ayuu yiri Madaxweynaha.
Sidoo kale, Wuxuu Madaxweyne
Xasan kula dardaarmey siyaasiyiinta iyo shacabka labada gobol inay hawlaha dib
u heshiisiinta sii wadaan, is cafiyaan, iskana fogeeyaan wax kasta oo kala geyn
kara shacabka walaalaha ah.
“Dib u heshiisiinta waa tiir
ka mid ah kuwa muhiimka u ah dib u dhiska dalka Soomaaliya. Dalkeena waxaa burburka
u horseeday waa siyaasadda oo inaga qaloocantey, sidaa darteed waxaa loo baahan
yahay in la dhiso siyaasad cusub oo dadka mideyneysa, kuna dhisan sinnaan,
cadaalad iyo in kheyraadka aan leenahay si wanaagsan looga wada faa’iideysto.
Waxaa weli caqabad nagu ah aafooyinkii ay reebeen dagaalada sokeeye oo
shacabkeena ku abuuray kalsooni darro iyo kala aamin bax. Waa inaan iska
ilownaa wixii la soo dhaafey , iyadoo loo marayo hannaan dib u heshiisiin iyo
is cafin ah, kadibna aan diiradda saarnaa sidii aan dalkeena u horumarin
lahayn’’, ayuu yiri Madaxweynaha.
Madaxweyne Xasan Sheekh ayaa
hadalkiisa ku daray in dowladdu aanay marnaba ka daali doonin hirgelinta
nidaamka federaalka, isla markaana uu isagu shakhsi ahaan waqti iyo dadaal
badan geliyay sidii loo dhisi lahaa maamulada jira, oo mararka qaar ay
hawlahaasi caqabado badan ka hor yimaadeen.
Dhanka kale, Madaxweynaha DF ayaa ugu dambeyn Madaxweynaha xusay in Soomaaliya ay u baahan tahay nidaam
garsoor oo caadil ah oo u baahan in laga wada shaqeeyo sidii lagu gaari lahaa,
isagoo dhanka kalena uugu baaqey qolyaha weli ka maqan shirka inay ku soo
biiraan madasha, oo ah halka ugu habboon ee ay ku soo gudbin karaan
tabashooyinka ay qabaan.
Ugu dambeyntii, Munaasabadda
furitaanka shirka dar-dar gelinta waxaa goob joog ka ahaa xubno ka tirsan
labada Gole, madaxda maamullada iyo xubno ka tirsan IGAD oo hawshan ka ah
fududeeye.
Maxamed X. Xuseen, Hiiraan Online
[email protected]
Muqdisho, Soomaaliya
