Madaxweyne Museveni oo Ciidamada uga Sugan Somalia ku Amaanay Hawl-karnimo (SAWIRRO)
Khamiis, September
15, 2016 (HOL) — Madaxweynaha Uganda, Yoweri Museveni ayaa ku ammaanay Ciidamada
Uganda ee qaybta ka ah Hawl-galka AMISOM doorka muhiimka ah ee ay ka
ciyaarayaan soo celinta nabadda Soomaaliya.
Yoweri Museveni, ayaa khudbad u
jeediyay Ciidamadiisa, kaddib markii uu ka Qayb-galay shir-madaxeedkii 28-aad ee
IGAD ee talaadadii todobaadkan Muqdisho lagu qabtay, ayaa u sheegay inay
ilaaliyaan Hab-dhaqanka ku saleysan Afrikaannimada, kaasoo uu xusay inuu yahay
mabda’a ugu muhiimsan ee ay ku dhisan yihiin ciidanka dalka Uganda.
“Waxaan idin-kaga Mahad-celinayaa
nabadda aad ku soo dabbaasheen Soomaaliya iyo in aad tusaale u noqoteen waxay
midnimadu qaban karto,” ayuu Museveni ku yiri khudbaddii uu ciidamadiisa u
jeediyay.
Sidoo kale, Museveni ayaa
booqday saldhigyada ciidamada Uganda ee Muqdisho ku yaalla, taasoo lagu sheegay
inay ahayd mid uu ku dhiirri-gelinayay Cidamadiisa ku sugan Somalia oo dhawr
jeer lagu eedeeyay xad-gudubyo ka dhan ah Shcabka Soomaaliyeed.
Dalka Uganda ayaa ahaa
waddankii ugu horreeyay oo Afrikaan ah oo Ciidammo u soo dira Somalia, si ay
gacan uga geystaan xasilinta dalka sanadkii 2007-dii, taasoo loo bedelay mar
dambe hawl-galka Midowga Afrika ee Somalia AMISOM.
Ugu dambeyn, Ciidanka Uganda oo ah kuwa ugu tirada badan ciidamada Somalia ku sugan ee ku hawl-gala
magaca Midowga Afrika, ayaa waxay Dagaallo Adag la galeen Xoogagga Al-shabaab,
inkastoo saldhig ku yaalla Jannaale oo lagu weerar loogu geystay looga Dilay
askartii ugu badnayd intii ay AMISOM ka tirsanaayeen.
Maxamed X. Xuseen, Hiiraan Online
[email protected]
Muqdisho, Soomaaliya
