Gudiga Doorashooyinka Somaliland oo sharci-daro ku tilmaamay gudi Dalada SONSAF ay magacowday
Khamiis, September
15, 2016 (HOL) — Guddiga Doorashooyinka Somaliland - ayaa ku tilmaamay sharci-daro Guddiga xalinta khilaafaadka bulshadda rayidka oo ay magacowday
daladda SONSAF ee aan Dowliga ahayn.
Guddida doorashooyinka
war-saxaafadeed ay soo saareen ayey ku sheegeen in aanay awood u lahayn inay
magacowdo guddi xalin khilaaf ee arrimaha doorashooyinka, isla markaana ay
masuuliyadeeda leedahay arrimaha doorashooyinka guddida doorashooyinka qaranka.
War-saxaafadeed ay guddida
doorashooyinku ku diidan yihiin guddidaasi magacowday Daladda SONSAF ayaa u
qornaa sidan “Gudida doorashooyinka qaranka waxa uu halkan ku cadaynayaa in
gudida loogu magac daray gudida xalinta khilafaadka doorashooyinka ee ay ku
dhawaaqeen dallada ururada aan dawliga ahayn Ee loo soo gaabiyo magacood
SONSAF,sida ku soo baxday warbaahinta kala duwan tariikhdii markii ay ahayd
08/09/2016 aanay ahay mid ku dhisan sharci.
Komiishanka Doorashooyinku
Qaranku waxa uu si cad u qayaxayaa inaanay Sonsof lahayn awood
sharciyadeed(Maandhayt)oo ay ku abuuri karto gudDi xalisa khilaafkaad
doorashooyinka,cid kaliya ee u igman qarankana uga masuul in ay xaliyaan
khilaafkaad iyo cabashooyinka doorashooyinku waa gudida doorashoyinka qaranka
sida ku cad qodob ka 14 farqadiisa 7aad ee xeerka(xeerLR.20-2001.
Muranada iyo cabashooyinka
la xidhiidha doorashadu waxa ay leeyihiin hab raac iyo jaran jaro dhamaystiran
oo loo raaco xalintooda kana bilaabmata Goobta codbixinta loona gudbiyo
xafiisyada heer degmo,heer gobol iyo heer qaran ee gudida doorashooyinka
qaranka,waxaanu habracaasi ku dhamadaa maxkamada sare ee dastuuriga ah ee
jamhuuriyada Somaliland.
Hab-racaasi lagu xaliyo
wixii muran ah ee doorashooyinka ka soo baxa waxa si cad u faah-faahinaya
xeerarka doorashooyinka sida xeerka doorashooyinka madaxtooyada iyo golayaasha
deegaanka qodobadiisa 14 farqadiisa 7aad,49,53 farqadiisa(4), 57aad (C),59aad
(3),62aad (1,2,3,),64aad (A), 65aad(1,2) iyo si waafaqsan qodobada
46aad,49aad(4),50aad(3),53aad (j), 57aad(f),49aad(c), 61aad(1,2)ee xeerka
doorashada golaha waiilada (xeer Lr 20-2/2015)”.
Toddobaad ka hor ayey ahayd
markii daladda SONSAF ay bishan sideeddii soo saartay guddi ay ugu magacdartay
guddida xalinta khilaafaadka Doorashooyinka, kuwaas oo ay u jireen ururadda
Bulshadda rayidka ah oo ay ugu tallogashay inay xaliyaan khilaafaadka ka dhasha
doorashooyinka.
Barkhad-ladiif M. Cumar,
Hiiraan Online
[email protected]
Hargeysa, Somaliland