UGAAS Xasan Ugaas Khaliif oo lagu daray Liiska 135-ta Oday ee soo Xulaya Xildhibaannada cusub
Arbaco, September 14, 2016 (HOL) —
Ugaas Xasan Ugaas Khaliif Ugaas Rooble oo bishii lasoo dhaafay loo caleema-saaray
Ugaaska Beesha Xawaadle, ayaa lagu daray Liiska 135-ta
oday-dhaqameed, kuwaasoo soo xulaya Xildhibaannada Baarlamaanka
cusub ee Somalia.
Hoggaamiyeyaashii ka Qayb-galay Shirkii Madasha Wada-tashiga Doorashooyinka 2016-ka ka dhacaya Somalia, ayaa isku raacay in Ugaas Xasan lagu daro liiska odayaasha
dhaqanka, waxaana Ugaasku kasoo horjeestay shirka lagu dhisayo maamulka Gobollada
Hiiraan iyo Shabeellada Dhexe.
Sidoo kale, Ugaaska ayaa ku
eedeeyay IGAD iyo Dowladda Federaalka Somalia inay xagal-daacin ku hayaan Gobolka Hiiraan, iyadoo Siyaasiyiin fara badan ay horay ugu eedeeyeen
madaxweynaha Somalia sababta looga saaray Ugaas Xasan liiska 135-ta oday-dhaqameed
ee xildhibaannada soo xulaya.
“Madasha Wada-tashiga Qaran waxay isku raacday
in Ugaas Xasan Ugaas Khaliif uu yahay Duubka Beesha Xawaadle ugu jira Liiska 135-ta
oday-dhaqmeed,Maadaama Beeshiisa ay si rasmi ah u caleema-saaratay, waxaana
lagu bedelay Cumar Ugaas,” ayaa lagu yiri bayaankii kasoo baxay Gunaanadkii Shirkii
Madasha Wada-tashiga Qaran.
Dhanka kale, Madaxweyne Xasan Sheekh - ayaa sheegay in dhawaan ka dhawaajiyay in uu aqoosan yahay Ugaas
Xasan Ugaas Khaliif, isagoo su’aal ahayd sababta loogu dari waayay 135-ta oday uga jawaabay in dib u sixida liiska oday-dhaqmeedyada ay u arkeen inay dib u
dhac ku keeni karto Doorashada, Balse wuxuu qiray in ay jiraan Khaladaadyo
ku jira Liiska odayaasha-dhaqanka.
Ugu dambeyn, Go’aanka
Madasha Hoggaamiyeyaasha Soomaalidu ay ku gaareen in Ugaas Xasan Ugaas Khaliif Ugaas
Rooble lagu daro Liiska 135-ta oday-dhaqmeed, ayaan la ogeyn in Ugaasku aqbali doono iyo in
kale.
Maxamed X. Xuseen, Hiiraan Online
[email protected]
Muqdisho, Soomaaliya
